الشرح

Yonente bi yal na ko Yàlla dolli xéewal ak mucc day xamle ci hadiisu xudsiyu bii ne Yàlla mu màgg mi nee na: ku lor ab wàlliyu ci sama wàlliyu yi daal di koy merloo daal di koy bañ kooku waajal naa ko ab xeex yégal naa ko ag noonoo. Wàlliyu mooy: aji-gëm ju ragal Yàlla, kem li nekk ci jaam bi ci ngëm ak ragal Yàlla la céram ci wàlliyu Yàlla di nekk. Te jullit bi du jegeñ-jegeñlu Boroomam ci dara lu ko gënal li mu farataal ci moom waral ko ci moom ci def jaamu yi, ak moytu yu araam yi, te jullit bi du deñ di jegeñ-jegeñlu Boroomam ci naafila yi boole ko ak farata yi; ba am mbëggeelu Yàlla. Te bu ko Yàlla bëggee, Yàlla da koy dëgëral ci ñenti céram yii: Da koy dëgëral ci déggam, du dégg lu dul luy gërëmloo Yàlla. Dëgëral ko ci gisam, du xool jëm ci lu dul lu Yàlla bëgg moo xool te mu gërëm ko. Mu dëgëral ko ci loxoom, du def ci lu dul luy gërëmloo Yàlla. Mu dëgëral ko ci tànkam, du dox jëm ci lu dul luy gërëmloo Yàlla, te du dox jëm ci lu dul aw yiw. Ànd ak lii bu ñaanee Yàlla dara Yàlla jox ko li mu laaj, mu nekk ku ñuy nangu ñaanam, bu musloo ci Yàlla làqu ci moom, ngir sàkku kaarànge Yàlla musal ko aar ko ci li muy ragal.