الشرح

មនុស្សមួយក្រុមមកពីកុលសម្ព័ន្ធ អ៊ុកល៍ ឬ អ៊ូរ៉ៃណាស់ បានមករកណាពី ﷺ ដើម្បីចូលសាសនាអ៊ីស្លាម។ ប៉ុន្តែពួកគេមានជំងឺដែលបណ្តាលឱ្យហើមពោះ។ ពួកគេមិនចូលចិត្តរស់នៅក្នុងម៉ាទីណះឡើយ ដោយសារតែអាហារ និងអាកាសធាតុមិនសមស្របនឹងពួកគេ។ បន្ទាប់មក ណាពី ﷺ បានបញ្ជាឱ្យពួកគេទៅកាន់សត្វអូដ្ឋដែលគេបរិច្ចាគ ដើម្បីផឹកទឹកដោះ និងទឹកនោមរបស់វា។ បន្ទាប់់មកពួកគេបានចាកចេញទៅ។ ប៉ុន្តែបន្ទាប់ពីពួកគេបានជាសះស្បើយ មានសាច់មានឈាម ហើយពណ៌ស្បែករបស់ពួកគេបានត្រលប់មកប្រក្រតីវិញ ពួកគេក៏បានសម្លាប់អ្នកគង្វាលរបស់ណាពី ﷺ ហើយបានលួចសត្វអូដ្ឋនោះ។ ដំណឹងនេះបានឮដល់លោកទាំងព្រឹក ហើយលោកក៏ចាត់កងទ័ពឲ្យដេញតាមពួកគេ។ ហើយក៏ទទួលជោគជ័យក្នុងការតាមទាន់ពួកគេ។ ពេលថ្ងៃមកដល់ ពួកគេត្រូវបាននាំមកក្នុងនាមជាអ្នកទោសយកទៅកាន់ណាពី ﷺ ។ បន្ទាប់មក លោកបានបញ្ជាឲ្យកាត់ដៃ និងជើងរបស់ពួកគេ ហើយភ្នែករបស់ពួកគេត្រូវចាក់ទម្លុះ ដោយសារតែពួកគេបានប្រព្រឹត្តបែបនេះចំពោះអ្នកគង្វាល។ បន្ទាប់មកគេបោះពួកគេចូលទៅក្នុងអាល់ហើរ៉ោះ(វាលទំនាប) ដែលជាកន្លែងដែលពួកគេត្រូវបានគេទុកអោយស្រេកទឹករហូតដល់ស្លាប់។ អាពូ គីឡាប៉ះ បាននិយាយថា៖ ពួកគេបានលួច សម្លាប់ ចេញពីជំនឿរបស់ពួកគេ ហើយបានប្រឆាំងនឹងអល់ឡោះ និងអ្នកនាំសាររបស់ទ្រង់។