الشرح

Aliyun Ibn Abii Taalib dafa yónnee ci Yonnente Yàlla bi yal na ko Yàlla dolli xéewal ak mucc mu bawoo fa Yaman ab dogu wurus mu nekk ci ab der bu ñu wullee garabu Xarad, te dogu wurus bi setul ca suuf sa, mu ne ko: Yonnente bi yal na ko Yàlla dolli xéewal ak mucc séddale ko ci diggante ñenti nit: Uyaynata ibn Badrin Al-Fisaari, ak Aqrah ibn Haabis Al-Habsalii, ak Sayd Al-Xalyl An-Nabahaanii, ak Halqamata ibn Hulaasata Al-Aamirii, benn waay ci Sahaabaam yi ne ko: Nun de noo ko gënoon a yayoo ci ñii, nee na: Yonnente bi yal na ko Yàlla dolli xéewal ak mucc yëg loo lu, mu wax ne: "ndax wóoluwuleen ma te man maay kóoluteg ki ci asamaan, xibaaru asamaan dima dikkal suba ak ngoon". Nee na: benn waay jug ñaari bët yaa nga dugg, kaw lex yi fés daal di yëkkëtiku, jë bi yëkkëtiku, sikkim bi sëq te guddul, mu watu, mu yëkkëti yéreem yi féete suuf daal di ne ko: Yaw Yonnente Yàlla bi ragalal Yàlla, Yonnente bi yal na ko Yàlla dolli xéewal ak mucc ne ko: "toskare ñeel na la xanaa du maa gën a yay ci waa suuf ci ragal Yàlla?!" Nee na: waabji dummóoyu, Xaalid ibnul waliid ne: Yaw Yonnente Yàlla bi, ndax duma dóor doqam gi. Mu ne ko: déedéet, amaana muy julli, Xaalid ne: Bariwaana kuy julli di wax ci làmmiñam lu nekkul ci xolam, Yonnente bi yal na ko Yàlla dolli xéewal ak mucc ne ko: Man digaluñu ma ma jeqi xoli nit ñi du caagine ma xotti seen i biir; waaye dañu ma a digal ma jël ci li feeñ ci seen i mbir, nee na: Topp mu xool ko fekk moo ngi dem, mu wax ne: Dina génn ci ndiggul waa jii ak i àndandoom walla giiram ay nit yu muus ci jàng téereb Yàlla bi ci kàddu gu neex, seen làmmiñ day tooy ci baril di ko jàng, te Alxuraan ji du jéggi seen i put ba seen i xol di ko xam mu man ko a yéwénal, te Yàlla du ko yëkkëti du ko nangu, dañuy génn ci lislaam kem ni ab xeej di génne ci fett gi ci gaawaay ak woyof. Ma njort ne dafa wax: bu ma fekke woon seen ug génn ak jaasi ci kaw jullit ñi kon dinaa leen ray ray gu tar gu mel ni rayug Samuud.