الشرح

ಸತ್ಯವಿಶ್ವಾಸಿಗಳ ಮಾತೆ ಆಯಿಷಾ (ಅಲ್ಲಾಹು ಅವರ ಬಗ್ಗೆ ಸಂಪ್ರೀತನಾಗಲಿ) ರವರು ತಿಳಿಸುವುದೇನೆಂದರೆ, ಅಲ್ಲಾಹನ ಸಂದೇಶವಾಹಕರಿಗೆ (ಅವರ ಮೇಲೆ ಅಲ್ಲಾಹನ ಕೃಪೆ ಮತ್ತು ಶಾಂತಿಯಿರಲಿ) ದೇವವಾಣಿ ಅವತೀರ್ಣವಾಗುವುದು ಪ್ರಾರಂಭವಾಗಿದ್ದು ನಿದ್ರೆಯಲ್ಲಿನ ಸತ್ಯವಾದ ಕನಸುಗಳ ಮೂಲಕ. ಅವರು ತಮ್ಮ ನಿದ್ರೆಯಲ್ಲಿ ಯಾವುದೇ ಕನಸನ್ನು ಕಂಡರೂ, ಅದು ಬೆಳಗಿನ ಜಾವದ ಬೆಳಕಿನಂತೆ ನಿಜವಾಗಿ ಬಿಡುತ್ತಿತ್ತು. ನಂತರ ಅವರಿಗೆ ಏಕಾಂತವಾಸವು ಪ್ರಿಯವಾಯಿತು. ಅವರು ಹಿರಾ ಗುಹೆಯಲ್ಲಿ ಏಕಾಂತದಲ್ಲಿರುತ್ತಿದ್ದರು ಮತ್ತು ತಮ್ಮ ಕುಟುಂಬದ ಬಳಿಗೆ ಮರಳುವ ಮೊದಲು ಅನೇಕ ರಾತ್ರಿಗಳವರೆಗೆ ಅಲ್ಲಿ ಆರಾಧನೆ ಮಾಡುತ್ತಿದ್ದರು. ಇದಕ್ಕಾಗಿ ಅವರು ಆಹಾರವನ್ನು ತೆಗೆದುಕೊಂಡು ಹೋಗುತ್ತಿದ್ದರು. ನಂತರ ಅವರು ಸತ್ಯವಿಶ್ವಾಸಿಗಳ ಮಾತೆ ಖದೀಜಾ (ಅಲ್ಲಾಹು ಅವರ ಬಗ್ಗೆ ಸಂಪ್ರೀತನಾಗಲಿ) ರವರ ಬಳಿಗೆ ಮರಳಿ, ಮತ್ತೆ ಅಷ್ಟೇ ರಾತ್ರಿಗಳಿಗಾಗಿ ಸಿದ್ಧತೆ ಮಾಡಿಕೊಳ್ಳುತ್ತಿದ್ದರು. ಕೊನೆಗೆ ಅವರು ಹಿರಾ ಗುಹೆಯಲ್ಲಿದ್ದಾಗ ಸತ್ಯವಾದ ಆದೇಶವು ಅವರ ಬಳಿಗೆ ಬಂದಿತು. ದೇವದೂತ ಜಿಬ್ರೀಲ್ (ಅವರ ಮೇಲೆ ಶಾಂತಿಯಿರಲಿ) ಅವರ ಬಳಿಗೆ ಬಂದು ಹೇಳಿದರು: ಓದಿರಿ. ಪ್ರವಾದಿಯವರು (ಅವರ ಮೇಲೆ ಅಲ್ಲಾಹನ ಕೃಪೆ ಮತ್ತು ಶಾಂತಿಯಿರಲಿ) ಹೇಳಿದರು: ನನಗೆ ಓದಲು ಬರುವುದಿಲ್ಲ. ಆಗ ಅವರು (ಜಿಬ್ರೀಲ್) ನನ್ನನ್ನು ಹಿಡಿದು ಅಪ್ಪಿಕೊಂಡು ಗಟ್ಟಿಯಾಗಿ ಅದುಮಿದರು. ಎಷ್ಟರಮಟ್ಟಿಗೆ ಎಂದರೆ ನನಗೆ ತೀವ್ರ ಸಂಕಷ್ಟವು ಅನುಭವವಾಯಿತು. ನಂತರ ಅವರು ನನ್ನನ್ನು ಬಿಟ್ಟು ಹೇಳಿದರು: ಓದಿರಿ. ನಾನು ಹೇಳಿದೆನು: ನನಗೆ ಓದಲು ಬರುವುದಿಲ್ಲ. ಆಗ ಅವರು ನನ್ನನ್ನು ಎರಡನೇ ಬಾರಿಗೆ ಹಿಡಿದು ಅಪ್ಪಿಕೊಂಡರು. ಎಷ್ಟರಮಟ್ಟಿಗೆ ಎಂದರೆ ನನಗೆ ತೀವ್ರ ಸಂಕಷ್ಟವು ಅನುಭವವಾಯಿತು. ನಂತರ ಅವರು ನನ್ನನ್ನು ಬಿಟ್ಟು ಹೇಳಿದರು: ಓದಿರಿ. ನಾನು ಹೇಳಿದೆನು: ನನಗೆ ಓದಲು ಬರುವುದಿಲ್ಲ. ಆಗ ಅವರು ನನ್ನನ್ನು ಮೂರನೇ ಬಾರಿಗೆ ಹಿಡಿದು ಅಪ್ಪಿಕೊಂಡರು. ನಂತರ ನನ್ನನ್ನು ಬಿಟ್ಟು ಹೇಳಿದರು: “ಸೃಷ್ಟಿಸಿದ ನಿನ್ನ ಪರಿಪಾಲಕನ (ಅಲ್ಲಾಹನ) ಹೆಸರಿನಿಂದ ಓದಿರಿ. ಅವನು ಮನುಷ್ಯನನ್ನು 'ಅಲಖ್' (ರಕ್ತದ ಹೆಪ್ಪುಗಟ್ಟಿದ ತುಂಡಿನಿಂದ) ಸೃಷ್ಟಿಸಿದನು. ಓದಿರಿ, ಮತ್ತು ನಿಮ್ಮ ಪರಿಪಾಲಕನು ಮಹಾ ಉದಾರಿಯಾಗಿದ್ದಾನೆ.” [ಅಲ್-ಅಲಖ್: 1-3]. ಪ್ರವಾದಿಯವರು (ಅವರ ಮೇಲೆ ಅಲ್ಲಾಹನ ಕೃಪೆ ಮತ್ತು ಶಾಂತಿಯಿರಲಿ) ಆ ವಚನಗಳೊಂದಿಗೆ ಮರಣದ ಭಯದಿಂದ ಕಂಪಿಸುವ ಹೃದಯದೊಂದಿಗೆ ಹಿಂದಿರುಗಿದರು. ಅವರು ತಮ್ಮ ಪತ್ನಿ ಸತ್ಯವಿಶ್ವಾಸಿಗಳ ಮಾತೆ ಖದೀಜಾ ಬಿಂತ್ ಖುವೈಲಿದ್ (ಅಲ್ಲಾಹು ಅವರ ಬಗ್ಗೆ ಸಂಪ್ರೀತನಾಗಲಿ) ರವರ ಬಳಿ ಬಂದು ಹೇಳಿದರು: ನನ್ನನ್ನು ಬಟ್ಟೆಯಿಂದ ಸುತ್ತಿರಿ, ನನ್ನನ್ನು ಬಟ್ಟೆಯಿಂದ ಸುತ್ತಿರಿ. ಖದೀಜಾ ಅವರನ್ನು ಬಟ್ಟೆಯಿಂದ ಸುತ್ತಿದರು. ಕೊನೆಗೆ ಅವರ ಭಯವು ನಿವಾರಣೆಯಾದಾಗ, ಅವರು ಖದೀಜಾ ರಿಗೆ ನಡೆದ ಸಂಗತಿಯನ್ನು ವಿವರಿಸಿ ಹೇಳಿದರು: ನನಗೆ ನನ್ನ ಪ್ರಾಣದ ಬಗ್ಗೆ ಭಯವಾಗುತ್ತಿತು. ಆಗ ಖದೀಜಾ ಹೇಳಿದರು: ಇಲ್ಲ, ಅಲ್ಲಾಹನಾಣೆ, ಅಲ್ಲಾಹು ನಿಮ್ಮನ್ನು ಎಂದಿಗೂ ಅವಮಾನಿಸುವುದಿಲ್ಲ. ಖಂಡಿತವಾಗಿಯೂ ನೀವು ರಕ್ತಸಂಬಂಧಗಳನ್ನು ಬೆಸೆಯುತ್ತೀರಿ, ತನ್ನ ಅಗತ್ಯಗಳನ್ನು ಸ್ವಯಂ ಪೂರೈಸಲಾಗದ ದುರ್ಬಲನ ಹೊರೆಯನ್ನು ಹೊರುತ್ತೀರಿ, ಏನೂ ಇಲ್ಲದ ಬಡವನಿಗೆ ಸಂಪಾದಿಸಿ ಕೊಡುತ್ತೀರಿ; ಅಂದರೆ ನೀವು ಜನರಿಗೆ ಬೇರೆ ಯಾರ ಬಳಿಯೂ ಸಿಗದಂತಹದ್ದನ್ನು ನೀಡುತ್ತೀರಿ, ಅತಿಥಿ ಸತ್ಕಾರ ಮಾಡುತ್ತೀರಿ, ಮತ್ತು ಸತ್ಯದ ಕಾರಣದಿಂದ ಉಂಟಾದ ಆಪತ್ತುಗಳಲ್ಲಿ ಸಹಾಯ ಮಾಡುತ್ತೀರಿ. ನಂತರ ಖದೀಜಾ ಅವರನ್ನು ಕರೆದುಕೊಂಡು ವರಖಾ ಇಬ್ನ್ ನೌಫಲ್ ಇಬ್ನ್ ಅಸದ್ ಇಬ್ನ್ ಅಬ್ದುಲ್ ಉಝ್ಝಾ ರವರ ಬಳಿಗೆ ಹೋದರು. ಅವರು ಖದೀಜಾ ರವರ ಚಿಕ್ಕಪ್ಪನ ಪುತ್ರರಾಗಿದ್ದರು. ಅವರು ಅಜ್ಞಾನಯುಗದ ಧರ್ಮವನ್ನು ತ್ಯಜಿಸಿ ಕ್ರೈಸ್ತರಾಗಿದ್ದರು. ಅವರು ಇಂಜೀಲ್ ಗ್ರಂಥದಿಂದ ಹೀಬ್ರೂ ಭಾಷೆಯಲ್ಲಿ ಅಲ್ಲಾಹು ಇಚ್ಛಿಸಿದಷ್ಟನ್ನು ಬರೆಯುತ್ತಿದ್ದರು. ಅವರಿಗೆ ಬಹಳ ವಯಸ್ಸಾಗಿದ್ದು ತಮ್ಮ ದೃಷ್ಟಿಯನ್ನು ಕಳೆದುಕೊಂಡಿದ್ದರು. ಖದೀಜಾ ಹೇಳಿದರು: ಓ ನನ್ನ ಚಿಕ್ಕಪ್ಪನ ಪುತ್ರರೇ, ನಿಮ್ಮ ಸಹೋದರನ ಮಗನಿಂದ ಕೇಳಿರಿ. ಆಗ ವರಖಾ ಕೇಳಿದರು: ಓ ನನ್ನ ಸಹೋದರನ ಮಗನೇ, ನೀನು ಏನನ್ನು ನೋಡಿದ್ದೀಯಾ? ಅಲ್ಲಾಹನ ಸಂದೇಶವಾಹಕರು (ಅವರ ಮೇಲೆ ಅಲ್ಲಾಹನ ಕೃಪೆ ಮತ್ತು ಶಾಂತಿಯಿರಲಿ) ತಾವು ನೋಡಿದ್ದನ್ನು ಅವರಿಗೆ ತಿಳಿಸಿದರು. ಆಗ ವರಖಾ ಹೇಳಿದರು: ಇದು ಅಲ್ಲಾಹು ಪ್ರವಾದಿ ಮೂಸಾ (ಅವರ ಮೇಲೆ ಶಾಂತಿಯಿರಲಿ) ರವರ ಬಳಿಗೆ ಕಳುಹಿಸಿದ ಅದೇ ಜಿಬ್ರೀಲ್ ಆಗಿದ್ದಾರೆ. ಆ ಸಮಯದಲ್ಲಿ ನಾನು ಯುವಕನಾಗಿದ್ದರೆ ಎಷ್ಟು ಚೆನ್ನಾಗಿತ್ತು! ನಿನ್ನ ಜನಾಂಗದವರು ನಿನ್ನನ್ನು ಹೊರಹಾಕುವಾಗ ನಾನು ಬದುಕಿದ್ದರೆ ಎಷ್ಟು ಚೆನ್ನಾಗಿತ್ತು! ಆಗ ಪ್ರವಾದಿಯವರು (ಅವರ ಮೇಲೆ ಅಲ್ಲಾಹನ ಕೃಪೆ ಮತ್ತು ಶಾಂತಿಯಿರಲಿ) ಕೇಳಿದರು: ಅವರು ನನ್ನನ್ನು ಹೊರಹಾಕುವರೇ?! ಅವರು ಹೇಳಿದರು: ಹೌದು. ನೀನು ತಂದಿರುವುದರಂತಹದ್ದನ್ನು ತಂದ ಯಾವೊಬ್ಬ ವ್ಯಕ್ತಿಯೂ ತೊಂದರೆಗೊಳಗಾಗದೆ ಮತ್ತು ದ್ವೇಷಿಸಲ್ಪಡದೆ ಉಳಿದಿಲ್ಲ. ಮತ್ತು ನಿನ್ನ ದಿನವು (ಆ ಸಮಯವು) ನನಗೆ ಸಿಕ್ಕರೆ, ನಾನು ನಿನಗೆ ಪ್ರಬಲವಾದ ಸಹಾಯವನ್ನು ನೀಡುವೆನು. ನಂತರ ಸ್ವಲ್ಪ ಸಮಯದಲ್ಲೇ ವರಖಾ ಮರಣ ಹೊಂದಿದರು, ಮತ್ತು ದೇವವಾಣಿ ಸ್ವಲ್ಪ ಕಾಲದವರೆಗೆ ವಿಳಂಬವಾಯಿತು.