الشرح

لەم فەرموودەیەدا عائیشە -ڕەزاى خواى لێبێت- باسی ئەوە دەکات کە شەوێکیان پێغەمبەر -صلى الله علیه وسلم- لە سەر جێگاکەی نەمابوو، وچوو بۆ ئەوەى بە دوایدا بگەڕێت وا گومانى برد کە چووە بۆ لای خێزانەکانى تری، پاشان دۆزیەوە کە لە ڕکوع یان سوجدەدا بوو ودەیفەرموو: (سُبْحَانَك وبِحَمْدِكَ، لا إله إلا أنت)، واته: (پاک وبێگەری بۆ تۆ ئەی پەروەردگار، وهەموو حەمد وسوپاسێک بۆ تۆ، هیچ پەرستراوێک هەق وڕاست نیە جگە لە تۆ)، واتا تۆ دووریت لە هەموو کەموکوڕی وعەیبێک، وسوپاس وحەمدت دەکەم لە سەر هەموو کردەوەیەکت، تەنها تۆ شایەنی ئەوەیت وەسف وستایش بکرێیت بە بێ سنوور، تەنها تۆ پەرستراوی هەق وڕاستی. لە ریوایەتێکدا: کاتێک بە دوایدا گەڕا دەستی بەر بنی پێی کەوت وڕۆشنایی نەبوو کە بیبینێت، ولە سوجدەدا بوو ودەیفەرموو: (اللَّهُمَّ إني أَعُوذ بِرِضَاك من سَخَطِك)، واته: پەنا بەمەیان -ڕازی بوونت- دەگرم بەوی تریان کە -توڕە بوونە-، چونکە هەموو شتێک بە پێچەوانەکەى چارەسەر دەکرێـت، تووڕ بوون دژەکەى ڕازی بوونە، بۆیە پەنا بە ڕازی بوونی خودا دەگرێت لە توڕە بوونی. (وبِمُعَافَاتِكَ من عُقُوبَتِكَ)، واته: پەنا بە لێخۆشبوونت دەگرم لە سزا دانت. ( وأعُوذ بِك مِنْك): واتا: پەنا بە خودا دەگرم لە خودای بەرز وشکۆدار؛ چونکە هیچ کەسێک ناتوانێت ڕزگارت بکات وپەنات بدات لە سزای خواى گەورە جگە لە خودا خۆی نەبێت. (لا أُحْصِي ثَناءً عليك أنت كما أَثْنَيْتَ على نفسك): ناتوانم بە گوێرەی پێویست وەسفت بکەم هەرچەندێک وەسف وستایشەکەم زۆر بێت، وهەرگیز ناتوانم بگەمە ئەو پلەی وەسفکردنەى کە تۆ شایەنیت. (أنت كما أَثْنَيْتَ على نفسك): واتا: ناتوانم وەسفت بکەم وەکو وەسفکردنی خۆت، چونکە هیچ کەس ناتوانێت وەسفی خودا بکات وبیبژرێت وەکو وەسف وستایشی خودا سەبارەت بە نەفسی خۆی.