الشرح

Nabiyaamã kõo kibare (Wẽnd pʋʋsg la A tɩlgr be a yĩngɑ) tɩ ad Wẽnde (A Naam zẽk yã) yeta hadiis ƙudsi pʋgẽ: Adem-biig tʋʋmã fãa, b fãagd-b lame yel-sõma piiga n tʋg n tãag kobs-yopoe, rẽnda a no-loeerã, ad yẽnda yaa Maam n so, maan-tɩ-b-yã ka zĩndid beenẽ, la Maam n yaood yẽ, n welg M Meng ne yel-sõmdã alkadrã bãngre, la a yel-sõmã wã fãoobo. Rẽ poorẽ t'a yeele (la no-loeerã yaa gãongo) la gũubu la lillgu, lɑ kãdeng n yi Bugmã; bala a yaa yõk-m-meng n yi yamleoodã lɑ lʋɩɩse zũnuub-rãmbẽ wã , la Bugmã gũbga ne yamleoodã. (La yãmb yem kɑm fãɑ no-loeer raare, bɩ ɑ rɑ maan kẽed-n-taare ye) la a yel-tɩʋʋdsã, la a ra gom gom-yood baa fʋɩ. (La a ra pãb no-pend ye) ne zabr la bʋʋr maanego. (Lɑ ned sã n tʋ-a maa a zaba ne-a) Ramdaanã pʋgẽ (bɩ a yeele: ad mam yaa ned sẽn loe noore) tõe t'a yõk a meng n bas-a, la a sã kell bala n nadgdẽ tɩ rẽndame tɩ yẽ zab ne-a sɩd-sɩda, a modgdame n gɩdg-a ne bũmb ninga sẽn yaa faag n yɩɩda, halɩ n wa tʋg n ta yẽ me sẽn tõe n maan tεka, wala ned ning sẽn baood n na n kʋ-f tɩ tεεd-ɑ to-to wã. Rẽ poorẽ tɩ Nabiyaamã (Wẽnd pʋʋsg la A tɩlgr be a yĩngɑ) wẽen ne yẽ yõorã sẽn be Naab ningã nugẽ wã, tɩ ad no-loεt noorã yũug toeengo Wẽnd nengẽ n yɩɩd noom dũni yikr raarã misk yũugã yãmb nengẽ, la a yel-somdã leb n yɩɩda misk b sẽn mɑɑn nonglem ne-ɑ tigsgã zĩisẽ lɑ zɩkrã zĩisẽ wã. La no-loεt tara sũ-nood a yiibu, n kɩdemd ne-ba: a sã n wa kao noorã a kɩdemdame, a komã la a ko-yũudã sẽn loogã, bala b kõ-a-la sore t'a kao a noorã, la a kɩdem ne a no-loeerã la a tũudumã pidbu, la a Soabã sẽn yols-a, la A sõng-a t'a sεg a no-loeerã. (La a sã n sεg a Soabã, a kɩdemda ne a no-loeerã) ne yaoodã la yel-sõmdã.