الشرح

Intumwa y'Imana (Imana iyihe amahoro n'imigisha) yavuze ko Allah Nyir'ubutagatifu yavuze muri Hadithil Qud'siy ati: Buri gikorwa mwene Adamu akoze akigororerwa byikubye inshuro icumi zikaba zanakiyongera kugera kuri magana arindwi, usibye igisibo, cyo ni icyanjye nticyagaragaramo gukorera ijisho, ni nanjye uzagihembera, bityo ninanjye uzi ingano y'ibihembo byacyo. Intumwa irangije iravuga iti: (Kandi igisibo ni urukingo) rukurinda, ni n'ingabo igukingira umuriro, kuko rukurinda kugira irari no kugwa mu byaha, kandi umuriro uzengurutswe n'ibiteye irari. (Umwe muri mwe naba yasibye azirinde amagambo mabi) nk'ayaganisha ku mibonano mpuzabitsina n'ibiyibanziriza, n'andi magambo mabi muri rusange. (Azirinde intonganya) n'urusaku. (Kandi nihagira umutuka cyangwa se akamurwanya mu kwezi wka Ramadhan ajye avuga ati: Njye nasibye, kuko hari ubwo yamureka, nakomeza akanga kuva ku izima agakomeza kumurwanya, akomeza kumwigizayo byoroheje. Hanyuma Intumwa y'Imana (Imana iyihe amahoro n'imigisha) irangije irarahira ku izina ry'ufite roho yayo mu biganza bye ko guhinduka k'umwuka wo mu kanwa k'uwasibye kubera gusiba ku munsi w'imperuka bizaba ari byiza kuruta impumuro y'umubavu, ndetse ni nabyo bizaba bifite ibihembo byinshi kuruta impumuro y'umubavu wo mu byicaro byo gusingiza Allah. Uwasibye yishima ubugira kabiri: Igihe ari gusiburuka, kuko inzara n'inyota yari afite iba irangiye, kuko noneho aba aziruriwe gusiburuka, ndetse akishimira ko asoje icyo gikorwa cyo kwiyegereza Allah neza, n'inkunga ya Allah no kuba yamworohereje ndetse akazanamworohereza no mu bisigaye. (N'igihe azaba ahuye na Nyagasani) yeretswe ingororano z'uko yasibye azaba yishimye.