الشرح

អ៊ិពនូអាប់ហ្ពាស رضي الله عنهما បានប្រាប់ថា កាលគាត់នៅតូច គាត់ធ្លាប់ជិះសត្វជាមួយណាពី ﷺ។ ពេលនោះ ណាពី ﷺ លោកបានមានប្រសាសន៍មកកាន់គាត់ថា៖ ពិតប្រាកដណាស់ ខ្ញុំនឹងបង្រៀនអ្នកនូវកិច្ចការ និងបញ្ហាមួយចំនួនដែលនឹងផ្តល់ផលប្រយោជន៍ដល់អ្នក៖ ចូរអ្នកថែរក្សា(ក្បួនច្បាប់)អល់ឡោះ៖ តាមរយៈការថែរក្សា(អនុវត្ត)នូវបទបញ្ជាទាំងឡាយរបស់ទ្រង់ និងចៀសឆ្ងាយពីប្រការទាំងឡាយដែលទ្រង់បានហាមឃាត់ដោយត្រូវឲ្យទ្រង់ឃើញអ្នកស្ថិតនៅលើការគោរពប្រតិបត្តិ និងការបញ្ជិតខ្លួនទៅកាន់ទ្រង់ជានិច្ច ហើយមិនត្រូវឲ្យទ្រង់ឃើញអ្នកស្ថិតក្នុងអំពើល្មើស និងបាបកម្មឡើយ។ ប្រសិនបើអ្នកធ្វើដូច្នោះ ការតបស្នងដែលអ្នកទទួលបាន គឺអល់ឡោះជាម្ចាស់នឹងថែរក្សាអ្នកពីប្រការអាក្រក់ទាំងឡាយទាំងក្នុងលោកិយ និងនៅថ្ងៃបរលោក ហើយទ្រង់នឹងជួយដល់អ្នកលើគ្រប់កិច្ចការរបស់អ្នក គ្រប់ទីកន្លែងដែលអ្នកទៅ។ បើកាលណាអ្នកចង់សុំអ្វីមួយ ចូរអ្នកកុំសុំពីនរណាក្រៅពីអល់ឡោះ ព្រោះមានតែទ្រង់មួយគត់ដែលជាអ្នកឆ្លើយតបចំពោះអ្នកដែលស្នើសុំទាំងឡាយ។ ហើយបើកាលណាអ្នកចង់សុំជំនួយអ្វីមួយ ចូរអ្នកកុំសុំជំនួយពីនរណាក្រៅពីអល់ឡោះឡើយ។ ហើយអ្នកត្រូវមានការជឿជាក់ប្រាកដក្នុងចិត្តថា គ្មានផលប្រយោជន៍(ប្រការលល្អ)អ្វីមួយកើតឡើងចំពោះអ្នកជាដាច់ខាត បើទោះជាអ្នកនៅលើផែនដីទាំងអស់ប្រមូលផ្តុំគ្នា និងរួបរួមគ្នាផ្តល់ផលប្រយោជន៍នោះដល់អ្នកក៏ដោយ លើកលែងតែអ្វីដែលអល់ឡោះបានកត់ត្រាសម្រាប់អ្នករួចប៉ុណ្ណោះ។ ហើយក៏គ្មានគ្រោះថ្នាក់ណាមួយកើតឡើងចំពោះអ្នកជាដាច់ខាត បើទោះជាអ្នកនៅលើផែនដីទាំងអស់ប្រមូលផ្តុំគ្នានិងរួបរួមគ្នាបង្កគ្រោះថ្នាក់ដល់អ្នក(ធ្វើបាបអ្នក)ក៏ដោយ លើកលែងតែអ្វីដែលអល់ឡោះបានកត់ត្រាចំពោះអ្នករួចប៉ុណ្ណោះ។ ពិតប្រាកដណាស់ កិច្ចការនេះអល់ឡោះជាម្ចាស់ពិតជាបានកត់ត្រាវា និងបានកំណត់វាស្របទៅតាមគតិបណ្ឌិត និងចំណេះដឹងរបស់ទ្រង់ ហើយគ្មានការផ្លាស់ប្តូរឡើយចំពោះអ្វីដែលអល់ឡោះបានកត់ត្រា។ ជាការពិតណាស់ ជនណាដែលថែរក្សា(ក្បួនច្បាប់)អល់ឡោះតាមរយៈការអនុវត្តនូវបទបញ្ជាទាំងឡាយរបស់ទ្រង់ និងចៀសវាងពីប្រការទាំងឡាយដែលទ្រង់ហាមឃាត់ នោះអល់ឡោះជាម្ចាស់នឹងនៅចំពោះមុខគេជានិច្ច ទ្រង់ដឹងពីស្ថានភាពរបស់គេ ជួយដល់គេ និងពង្រឹងភាពរឹងមាំដល់គេ។ ពិតណាស់ ជនណាហើយដែលគោរពប្រតិបត្តិអល់ឡោះនៅពេលសប្បាយរីករាយ នោះទ្រង់នឹងបើកផ្លូវដល់គេ ផ្តល់នូវច្រកចេញដល់គេវិញនៅពេលដែលគេជួបនឹងការលំបាក និងភាពតានតឹង។ ហើយខ្ញុំបម្រើអល់ឡោះត្រូវពេញចិត្តទទួលយកនូវអ្វីដែលអល់ឡោះជាម្ចាស់ទ្រង់បានកំណត់ចំពោះរូបគេមិនថាល្អ ឬអាក្រក់នោះឡើយ។ ជាការពិតណាស់ ក្នុងពេលដែលជួបការលំបាក និងគ្រោះអកុសលនានា ចាំបាច់លើខ្ញុំបម្រើអល់ឡោះត្រូវមានការអត់ធ្មត់ ព្រោះភាពអត់ធ្មត់ គឺជាកូនសោនៃភាពធូរស្រាល(ពីទុក្ខសោក)។ កាលភាពតានតឹងកាន់តែខ្លាំង ភាពធូរស្រាលពីអល់ឡោះកាន់តែជិតមកដល់។ ហើយទន្ទឹមនឹងការលំបាក អល់ឡោះជាម្ចាស់នឹងផ្តល់នូវភាពងាយស្រួល។