الشرح

ალლაჰის მოციქულმა (ალლაჰის ლოცვა და მშვიდობა მას) გვაუწყა, რომ ჩვენს წინათ არსებულ ერთ-ერთ ხალხში იყო მეფე, რომელსაც ჰყავდა ჯადოქარი. როცა ჯადოქარი დაბერდა, მან მეფეს უთხრა: მე უკვე დავბერდი, ამიტომ გამომიგზავნე ერთი ახალგაზრდა, რომ მას ჯადოქრობა ვასწავლო. მეფემ მას ახალგაზრდა გაუგზავნა, რათა ჯადოქრობა ესწავლებინა. ახალგაზრდა, როცა ჯადოქართან მიდიოდა, გზად ერთი ბერი შეხვდა, ერთხელ მასთან დაჯდა და მისი საუბარი მოისმინა, რამაც ძალიან მოხიბლა, ამის შემდეგ, როდესაც ჯადოქართან მიდიოდა, ბერთან ჩერდებოდა და მასთან საუბრობდა. მაგრამ ჯადოქართან დაგვიანების გამო ის სცემდა. ახალგაზრდამ შესჩივლა ამ ბერს, და ბერმა უთხრა: როცა ჯადოქრის შეგეშინდება, უთხარი: ოჯახმა შემაყოვნა. ხოლო როცა ოჯახის შეგეშინდება, უთხარი: ჯადოქარმა შემაყოვნა, ასე გაგრძელდა მანამ, სანამ ერთხელ გზაზე დიდი ცხოველი არ შეხვდა, რომელმაც ხალხს გზა გადაუკეტა. მაშინ მან თქვა: დღეს გავიგებ, ჯადოქარი უმჯობესია თუ ბერი? მაშინ მან აიღო ქვა და თქვა: ო, ალლაჰ! თუ ბერის საქმე შენთვის უფრო საყვარელია, ვიდრე ჯადოქრის საქმე, მაშინ მოკალი ეს ცხოველი, რათა ხალხმა გზა განაგრძოს, შემდეგ მან ქვა ესროლა და ცხოველი მოკლა, რის შედეგადაც ხალხმა გზა გააგრძელა, ამის შემდეგ ის ბერთან მივიდა და ეს ამბავი უამბო. ბერმა კი უთხრა: შვილო, დღეს შენ ჩემზე უკეთესი ხარ. შენი საქმე ისე წინ წავიდა, როგორც ვხედავ. შენ მალე გამოცდას გაივლი, და თუ ამ განსაცდელში აღმოჩნდები, ნუ გამცემ. ეს ახალგაზრდა ალლაჰის ნებით ბრმებს და კეთროვანებს კურნავდა და ხალხს სხვადასხვა დაავადებისგან მკურნალობდა, ერთ დღეს მეფის ახლობელმა, რომელმაც მხედველობა დაკარგა, ამის შესახებ შეიტყო, ის უამრავი საჩუქრით მივიდა ახალგაზრდასთან და უთხრა ამ ბიჭს: ეს ყველაფერი, რაც აქაა, საჩუქრად შენთვის იქნება, თუ შენ მე განმკურნავ. ახალგაზრდამ უპასუხა: მე არავის ვკურნავ, ალლაჰია მხოლოდ რომელიც კურნავს, თუ ალლაჰს ირწმუნებ, მე მას ვთხოვ და ის განგკურნავსო. მეფის მსახურმა ალლაჰის ირწმუნა, და ალლაჰმა მას მხედველობა დაუბრუნა. შემდეგ ის მეფესთან მივიდა როგორც ჩვეული იყო და მის გვერდით დაჯდა. მეფემ კი ჰკითხა: ვინ დაგიბრუნა მხედველობა? მან უპასუხა: ჩემმა ღმერთმა, მეფემ ჰკითხა: შენ ჩემს გარდა სხვა ღმერთი გყავს? მან უპასუხა: ჩემი და შენი ღმერთი ალლაჰია. მეფემ იგი დააპატიმრა და აწამებდა მანამ, სანამ მან არ გაამხილა ახალგაზრდა, შემდეგ ახალგაზრდა მოიყვანეს მეფესთან, და მეფემ მას ჰკითხა: შვილო, შენი ჯადოქრობა იმდენად გაძლიერდა, რომ ბრმებს და კეთროვანებს კურნავ და სხვა საოცრებებსაც ჩადიხარ. ახალგაზრდამ უპასუხა: მე არავის ვკურნავ, მხოლოდ ალლაჰია რომელიც კურნავს, მეფემ ის დააპატიმრა და აწამებდა მანამ, სანამ მან არ გაამხილა ბერი. შემდეგ ბერი მოიყვანეს და მას უთხრეს: უარყავი შენი სარწმუნოება! მაგრამ მან უარი თქვა. მაშინ მეფემ ხერხი მოატანინა, მას თავის შუაში დაადეს და ხერხით ორ ნაწილად გაჭრეს. შემდეგ მეფის მსახური მოიყვანეს და მასაც უთხრეს: უარყავი შენი სარწმუნოება! მაგრამ მანაც უარი თქვა. მაშინ მასაც თავის შუაში დაადეს და ხერხით ორად გაჭრეს. შემდეგ ახალგაზრდა მოიყვანეს და უთხრეს: უარყავი შენი სარწმუნოება! მაგრამ მან უარი თქვა. მაშინ მეფემ იგი თავის მეგობრებს ჩააბარა, რომლებიც სამიდან ათამდე კაცი იყვნენ. მეფემ ბრძანა: წაიყვანეთ იგი ამა და ამ მთაზე, აიყვანეთ მწვერვალზე, თუ თავის სარწმუნოებაზე უარს იტყვის, გაუშვით, ხოლო თუ არა – გადააგდეთ, წაიყვანეს ბიჭი და მთის მწვერვალზე აიყვანეს. მაშინ ახალგაზრდამ თქვა: ო, ალლაჰ! მიხსენი მათგან ისე, როგორც შენ ისურვებ! მთამ ძლიერად დაიწყო რყევა და მოძრაობა, რის შედეგადაც ყველა ჩამოვარდა და დაიღუპა. ახალგაზრდა კი მშვიდად ჩამოვიდა და მეფესთან დაბრუნდა. მეფემ ჰკითხა მას: რა დაემართათ შენს თანმხლებებს? მან უპასუხა: ალლაჰმა მათგან მიხსნა. მეფემ იგი სხვა ჯარისკაცებს გადასცა და უბრძანა: წაიყვანეთ იგი და ჩასვით პატარა ნავში, გაიყვანეთ ზღვის შუაგულში, თუ თავის სარწმუნოებაზე უარს იტყვის, გაუშვით, ხოლო თუ არა – გადააგდეთ ზღვაში. წაიყვანეს ბიჭი , მაგრამ ახალგაზრდამ თქვა: ო, ალლაჰო! მიხსენი მათგან ისე, როგორც შენ ისურვებ! მაშინ ნავი გადაბრუნდა და ყველა მათგანი ჩაიძირა, ახალგაზრდა კი მშვიდად გამოვიდა და კვლავ მეფესთან დაბრუნდა. მეფემ ჰკითხა მას: რა დაემართათ შენს თანმხლებებს? მან უპასუხა: ალლაჰმა მათგან მიხსნა. შემდეგ ახალგაზრდამ მეფეს უთხრა: შენ ვერ მომკლავ, სანამ არ გააკეთებ იმას, რასაც გეტყვი. მეფემ ჰკითხა: რა არის ის? ახალგაზრდამ უთხრა: შეგიძლია მომკლა მხოლოდ იმ შემთხვევაში, თუ გააკეთებ იმას, რასაც გეტყვი: შეკრიბე ხალხი გაშლილ ადგილას, მიმსჭვალე ხის ტოტზე, შემდეგ აიღე ერთი ისარი ჩემი ისრის ჩანთიდან, მოათავსე ისარი მშვილდზე, შემდეგ კი თქვი: ამ ბიჭის ღმერთის სახელით, და მაშინ მესროლე, თუ ამას გააკეთებ, ნამდვილად მომკლავ. მეფემ შეკრიბა ხალხი ღია ადგილას, მიაბა ახალგაზრდა ხეზე, შემდეგ აიღო ისარი მისი ისრებიდან, მოათავსა მშვილდზე და ხმამაღლა თქვა: ამ ბიჭის ღმერთის სახელით, შემდეგ ესროლა მას და ისარი მის საფეთქელში მოხვდა, თვალსა და ყურს შორის, ახალგაზრდამ ხელი საფეთქელზე დაიდო, სადაც ისარი მოხვდა, და გარდაიცვალა. მაშინ ხალხმა ხმამაღლა თქვა: ჩვენ ვირწმუნეთ ამ ბიჭის ღმერთის, ჩვენ ვირწმუნეთ ამ ბიჭის ღმერთის, ჩვენ ვირწმუნეთ ამ ბიჭის ღმერთის. მეფესთან მივიდნენ და უთხრეს: მოხდა ის, რასაც შიშობდი? ვალლაჰი, შენ დაგატყდა ის, რისიც გეშინოდა! ხალხი ბიჭს მიჰყვა და ყველამ ირწმუნა მისი ღმერთის, მეფემ მაშინ ბრძანა, რომ ქალაქის ქუჩების შესასვლელებთან უზარმაზარი თხრილები გაეთხარათ, შემდეგ კი ამ თხრილებში ცეცხლი გაეჩაღებინათ. მეფემ თქვა: ვინც თავის სარწმუნოებაზე უარს არ იტყვის, ცეცხლში გადააგდეთ! მეფის ბრძანებას დაემორჩილნენ და ხალხს ცეცხლში ყრიდნენ, ამ დროს ერთმა ქალმა, რომელიც პატარა შვილთან ერთად იყო, შეჩერდა და ვერ გაბედა ცეცხლში შესვლა. მას შეეშინდა და გაჩერდა ერთ ადგილზე და უარი თქვა ცეცხლში შესვლაზე, მაშინ მისმა პატარა შვილმა უთხრა: ო, დედაჩემო, მოითმინე, რადგან შენ ჭეშმარიტებაზე ხარ.