الشرح

Lɩsalaam sã n tʋll n maan yell, a sẽn ka mi yaa sõma bɩ ka sõma, rẽnn sãri maaname t'a pʋʋs rakaar a yiibu, (tũus-n-yãk Pʋʋsgã), bala Nabiyaamã (Wẽnd pʋʋsg lɑ A tɩlgr be ɑ yĩngɑ) rag n yɩɩme n wilgd a sahaabsã (Wẽnd yarb be b yĩnga) Pʋʋs-kãngã, wala a sẽn wilgd-b Alkʋrãan Sʋʋra, rẽnd a pʋʋsda rakaar a yiib sẽn yaa naafɩle, rẽ poorẽ t'a kos Wẽnd n yeele: «M Soab A Wẽnde, m kot-F lame tɩ f tũus sõma n kõ-ma» ne m sẽn baood segl sõngã yεl a yiibã yembr sẽn yaa sõma n yɩɩdã, m leb n kot-f lame «ne fo bãngrã» sẽn yaa yalengã n gũbg bũmb a fãa wã, «la m kot-f tõogo», tɩ F maan maam tɩ m yɩ tũudã, bala sɩlem ka be ne maam, pãng ka be ne maam sã n ka ne Foom, «ne Fo tõogã» tõog ning sẽn yɩt bũmbã fãa zugã, bala bũmb ka be Fo sẽn kongd ye, «la m kot Fo kũunã» la F manegrã, «sẽn yaa bedrã» n yaa yalengã,. bala Fo kũunã yaa maan neer sẽn yi Fo nengẽ, ned baa a yembr ka tar hakε fo zug neema pʋgẽ ye, «bala Foom n tõe bũmbã fãa», mam yaa valenga n yaa koamsa, «m ka tõe baa fʋɩ» sã n ka sẽn tũ ne sõngr sẽn yi Fo nengẽ, «la» Foom Wẽnde, «Foom n mi» ne fo bãngrã sẽn gũbgã, sẽn solg la sẽn vẽnege, sẽn yaa sõma la sẽn yaa wẽnga, «la» maam, «m ka mi baa fʋɩ», sã n ka sẽn tũ ne Fo segl sõngo la Fo kãngdgrã, «Foom la yel-soaandɩ mita», rẽnd Foom n tar bãngr sẽn gũbg zãnga, la tõog sẽn rʋʋgd bũmbã fãa, la zẽng sẽn pa Foom ka tar rẽnda, sã n ka Fo sẽn kõ-a tõog ne bũmb ningã, la Fo sẽn maan t'a tõog bũmb ningã. Rẽ poorẽ lɩslaam kota a Soabã la a togs a tʋlsmã n yeele: «m Soab A Wẽnde» m bobla m yellã Foom la «Fo sã n miẽ» Fo bãngrã pʋgẽ tɩ yel-kãngã «la a pʋd a tʋlsmã yʋʋre» wala zɑk-kãngɑ rɑɑbã, maa mobil-kãngã raabã, maa pʋg-kãngã furbã, maa zẽng sẽn ka rẽ... Sã n mik tɩ yel-kãngã, rag n renga taoor Fo bãngrã pʋgẽ, tɩ «sõma n be ne maam dĩinã pʋgẽ» bũmb ning sẽn yaa mam yellã koglgã, «la m vɩɩmã» m dũni wã pʋgẽ «la m yellã baasgo» a sẽn na n wa baas ne bũmb ningã, maa a yeelame:«m yel yãgdi wã pʋgẽ la m yel yɑoogã» dũni la laahre; «bɩ F kord-a» la F seglg-a la F kɩt t'a yɩ «n kõ maam», la F maan-a t'a yɩ nɑ-nɑ «la F yols-a n kõ maam», «rẽ poorẽ bɩ F maan barka» la F wʋsg sõmã wã «n kõ maam a pʋgẽ», «la Fo sã n miime», m Soab A Wẽnde, «tɩ yel-kãngã», mam sẽn baood yãk sõng a pʋgẽ wã, «t'a yaa wẽng ne mam vɩɩmã pʋgẽ la mam yellã baasgẽ- Maa a yeelame: m yel yãgdi wã pʋgẽ la m yel yɑoogã- bɩ F wẽnems-a n yi maam la F wẽnems maam n yi-a, la F kord sõma n kõ-ma sẽn wa n yaa zĩig ning fãa, rẽ poorẽ, bɩ F yar maam ne-a», la F bʋʋdã fãa gilli, mam sẽn nongã la mam sẽn kisã.