អំពី អាប់ទុលឡោះ ពិន ពុសរ៍ رضي الله عنه បាននិយាយថា៖ មានបុរសម្នាក់បានទៅជួបណាពី ហើយបាននិយាយថា៖ ឱរ៉ស៊ូលុលឡោះ! ពិតប្រាកដណាស់ ច្បាប់បញ្ញត្តិអ៊ីស្លាមមានច្រើនពេកហើយចំពោះពួកយើង។ ហេតុនេះ សូមលោកប្រាប់នូវអ្វីមួយដើម្បីឲ្យពួកយើងបានប្រកាន់ខ្ជាប់នឹងវា។ លោកបានឆ្លើយថា៖ “ចូរឲ្យអណ្ដាតរបស់អ្នកសើមជាប់ជានិច្ចដោយការរលឹកទៅចំពោះអល់ឡោះ”។ រីឯនៅក្នុងសេចក្តីរាយការណ៍មួយផ្សេងទៀត៖ អំពីហាទីស្ហ មូអាស ពិន ជើហ្ពាល់ ថា៖ ពាក្យចុងក្រោយដែលខ្ញុំបាននិយាយជាមួយរ៉ស៊ូលុលឡោះ ﷺ គឺ៖ តើទង្វើណាមួយដែលប្រសើរជាងគេ និងធ្វើឲ្យខិតជិតអល់ឡោះជាម្ចាស់ជាងគេ? លោកបានឆ្លើយថា៖ “គឺការដែលអ្នកស្លាប់ចាកចេញពីលោកិយ ហើយអណ្តាតរបស់អ្នកនៅសើមដោយការរលឹកចំពោះអល់ឡោះជាម្ចាស់”។