الشرح

عائشہ رضی اللہ عنہا سے مروی حدیث میں اس بات کا بیان ہے کہ نبی ﷺ جب قضاے حاجت کی جگہ سے باہر تشریف لاتے تو آپ ﷺ فرماتے: ”غفرانك“ یعنی آپ ﷺ اللہ سے مغفرت طلب کرتے۔ شاید اس میں حکمت یہ ہے کہ قضاے حاجت کی وجہ سے جب انسان کی حسی گندگی میں کمی ہوتی ہے تو مناسب یہ ہے کہ وہ معنوی گندگی میں کمی کی بھی دعا کرے۔ ابن مسعود رضی اللہ عنہ سے مروی حدیث میں اس بات کا بیان ہے کہ نبی ﷺ قضاے حاجت کے لیے تشریف لے گۓ تو آپ ﷺ نے انہیں تین پتھر لانے کا حکم دیا۔ انہیں دو پتھر تو مل گئے لیکن تیسرا نہ ملا۔ اس پر انہوں نے چوپائے کے خشک گوبر کواٹھا لیا اور یہ سوچ کر آپ ﷺ کے پاس آ گئے کہ پتھر کی بجائے اس سے کام چل جائے گا۔ نبی ﷺ نے دو پتھر لے لیے، ان سے طہارت حاصل کی، گوبر کو پھینک دیا اور اس کی وجہ بیان کرتے ہوئے فرمایا کہ یہ ناپاک ہے اور اس سے پاخانے کی جگہ کو صاف کرنا درست نہیں ہے۔ یہ حکم ہر قسم کے گوبر کے بارے ہے۔ کیوںکہ اگر گوبر ان جانوروں کا ہو، جن کا گوشت کھانا جائز نہیں، جیسا کہ اس حدیث میں ہے، تو یہ ناپاک ہے اور اگر ان جانوروں کا ہو، جن کا گوشت حلال ہے، تو اس صورت میں یہ جنات کے چوپایوں کی خوراک ہے۔