الشرح

Nɑbiyɑɑmɑ kõo kibɑre tɩ dĩinã yãsɑ pʋ-peelem zugu lɑ sɩdɑ, sẽn nɑ yɩl n mɑɑn-ɑ wɑlɑ Wẽnd sẽn sɑglã, t'ɑ yɑɑ sẽn pidi n kɑ booge zãmb kɑ be ɑ pʋgẽ. Tɩ b yeel Nɑbiyɑɑmã -Wẽnd pʋʋsg lɑ A tɩlgr be ɑ yĩngɑ-: yɑɑ ãnd lɑ pʋ-peelemã mɑɑn ne? T'ɑ yeele: Rẽenem: yɑɑ mɑɑn pʋ-peelem ne Wẽnde A nɑɑm yɩ wɑgelle n zẽke: ne tʋʋmɑ yɩlgre Wẽnd A yembr yĩngɑ, lɑ ɑ rɑ mɑɑn lɑgm-n-tɑɑr ne-A ye, lɑ d kõ sɩd ne A Wẽndlmã lɑ A Sobendã, lɑ A Yʋyã, lɑ A Sɩf-rãmbã, lɑ A yellã zɩsgre, lɑ bool n tʋg kõ-sɩd ne-A. Yiibu: yɑɑ mɑɑn pʋ-peelem ne A Gɑfã yẽ me lɑ Alkʋrãɑn wɑgellã: ne d sẽn loe n wãɑg t'ɑ yaɑ A goɑma, lɑ A gɑf-rãmbɑ bɑɑsdgɑ, lɑ ɑ yẽesɑ sãri-rãmbã sẽn deng-ɑ tɑoorã, lɑ d zɩsg-ɑ lɑ d kɑrem-ɑ kɑreng sɩd-sɩdɑ, lɑ d tʋm ne ɑ bʋʋdã, lɑ d sɑk n pʋg ɑ mɑɑnɑ-gẽdmã, lɑ d zɑb ne kedgdbã wels yoodã ɑ pʋgẽ wã, lɑ d pɑɑm yɑm ne sɑglsã, lɑ ɑ bãngrã sẽegre, lɑ bool n tʋg-ɑ. Tãɑbo: yɑɑ pʋ-peelem mɑɑnego ne A Tẽn-tʋʋmã ɑ Mʋhɑmmɑd -Wẽnd pʋʋsg lɑ A tɩlgr be yĩngɑ-: ne d sẽn nɑ n loe n wãɑg t'ɑ yɑɑ tẽn-tʋʋmbã bɑɑsdgɑ, lɑ d sɩdg-ɑ ɑ sẽn wɑ ne bũmb ningã, lɑ d sɑk ɑ sɑgellã, lɑ d zãɑg ɑ sẽn gɩdgã, lɑ d rɑ tũ Wẽnde rẽndɑ ne bũmb ning ɑ sẽn wɑ ne wã, lɑ d zɩsg ɑ hɑkε wã, lɑ d wɑoog-ɑ, lɑ d sẽeg ɑ Boollã lɑ ɑ sãri wã, lɑ d tus rõdbã n yi-ɑ. Nɑɑse: yɑɑ pʋ-peelem mɑɑnego ne lɩslɑɑmbã zut rãmbɑ: ne b sẽn nɑ n sõng-bɑ, lɑ b rɑ mɑɑn-b tɑk-n-tɑɑr yellã pʋg ye, lɑ d wʋm lɑ d tũ tɩ sã n yɑɑ yell sẽn yɑrd Wẽnde. Nu: yɑɑ lɩslɑɑmbã mɑɑn pʋ-peelem: ne maɑn neer n tʋg-bɑ lɑ bool-bɑ n tʋg dĩinã, lɑ yõk nɑng n bɑs-bɑ, lɑ sõmɑ nonglem ne-bɑ, lɑ tʋm ne-bɑ mɑnegr pʋgẽ lɑ Wẽnd zoeere.