الشرح

ណាពី ﷺ លោកបានធ្វើការទូអាបួងសួងមួយដែលវាប្រមូលផ្តុំទៅដោយមូលដ្ឋាននៃសីលធម៌ដ៏ថ្លៃថ្នូរ ដែលលោកត្រូវបានបញ្ជូនមកដើម្បីបំពេញនូវភាពល្អឥតខ្ចោះនៃសីលធម៌នេះ គឺភាពល្អប្រសើរខាងផ្នែកសាសនា ជីវិតលោកិយ និងបរលោក។ នៅក្នុងប្រយោគដ៏ខ្លីនេះ លោកបានបួងសួងដោយសង្ខេបនូវប្រការល្អទាំងបីនេះ ដោយចាប់ផ្ដើមដោយភាពល្អប្រសើរផ្នែកខាងសាសនា ដែលជាគន្លឹះដែលនាំមកនូវភាពល្អប្រសើរនៅក្នុងលោកទាំងពីរ។ លោកបានបួងសួងថា៖ “اللهُمَّ أَصْلِحْ لِي دِينِي” (ឱអល់ឡោះជាម្ចាស់! សូមទ្រង់មេត្តាកែតម្រូវឲ្យខ្ញុំនូវសាសនារបស់ខ្ញុំ) ដោយចង្អុលបង្ហាញរូបខ្ញុំឲ្យអនុវត្តនូវកាតព្វកិច្ចទាំងឡាយរបស់វាក្នុងលក្ខណៈពេញលេញ។ “الَّذِي هُوَ عِصْمَةُ أَمْرِي” (ដែលវាគឺជាអ្នកការពារកិច្ចការរបស់ខ្ញុំ) និងថែរក្សាកិច្ចការទាំងអស់របស់ខ្ញុំ។ ប្រសិនបើសាសនារបស់ខ្ញុំខូចខាត កិច្ចការទាំងឡាយរបស់ខ្ញុំក៏នឹងខូចខាតដែរ ហើយខ្ញុំនឹងទទួលនូវភាពបរាជ័យនិងការខាតបង់ជាមិនខាន។ ដោយសារតែភាពល្អប្រសើរខាងផ្នែកសាសនាមិនអាចសម្រេចបានដោយគ្មានភាពល្អប្រសើរខាងផ្នែកលោកិយ លោកបានបួងសួងបន្តថា៖ “وَأَصْلِحْ لِي دُنْيَايَ” (សូមទ្រង់មេត្តាកែតម្រូវឲ្យខ្ញុំនូវលោកិយរបស់ខ្ញុំ) ដោយផ្ដល់ឱ្យខ្ញុំនូវសុខភាពល្អ ភាពសុខសាន្ត លាភសក្ការៈ ភរិយាល្អ កូនចៅដែលល្អ ហើយនិងអ្វីដែលខ្ញុំត្រូវការ និងសូមឲ្យវាជារបស់ដែលស្របច្បាប់ និងជាអ្នកជួយដល់ខ្ញុំក្នុងការគោរពប្រតិបត្តិចំពោះទ្រង់។ បន្ទាប់មក លោកបានលើកឡើងពីមូលហេតុដែលលោកសុំឲ្យទ្រង់កែលម្អលោកិយនេះដោយលោកបានបន្តថា៖ “الَّتِي فِيهَا مَعَاشِي” (ដែលវាជាកន្លែងរស់នៅរបស់ខ្ញុំ) និងជាពេលវេលានៃជីវិតរបស់ខ្ញុំ។ “وَأَصْلِحْ لِي آخِرَتِي الَّتِي فِيهَا مَعَادِي” (និងសូមទ្រង់មេត្តាកែតម្រូវឲ្យខ្ញុំនូវបរលោករបស់ខ្ញុំដែលវាជាកន្លែងវិលត្រឡប់របស់ខ្ញុំ) និងជាការវិលត្រឡប់របស់ខ្ញុំទៅជួបនឹងទ្រង់ តាមរយៈការកែលម្អទង្វើទាំងឡាយ និងចង្អុលបង្ហាញខ្ញុំបម្រើរបស់ទ្រង់ឲ្យគោរពសក្ការៈ មានភាពជ្រះថ្លា និងស្លាប់ក្នុងលក្ខណៈដែលល្អ។ ហើយណាពី ﷺ បានដាក់បរលោកបន្ទាប់ពីលោកិយ ព្រោះលោកិយគឺជាមធ្យោបាយឈានទៅរកភាពល្អប្រសើរនៃបរលោក។ ដូចនេះ ជនណាដែលរស់នៅក្នុងលោកិយស្របតាមការចង់បានរបស់អល់ឡោះ នោះបរលោករបស់គេនឹងត្រូវបានកំណត់ត្រឹមត្រូវសម្រាប់គេ ហើយគេនឹងទទួលបានសុភមង្គលនៅទីនោះ។ “وَاجْعَلِ الْحَيَاةَ زِيَادَةً لِي فِي كُلِّ خَيْرٍ” (ហើយសូមទ្រង់មេត្តាធ្វើឲ្យជីវិតស់នៅ និងការមានអាយុវែង គឺជាការបន្ថែមនូវប្រការល្អទាំងអស់ដល់ខ្ញុំ) ដើម្បីឱ្យខ្ញុំអាចបង្កើននូវទង្វើល្អក្នុងជីវិតរស់នៅឲ្យបានកាន់តែច្រើនផង។ “وَاجْعَلِ الْمَوْتَ رَاحَةً لِي مِنْ كُلِّ شَرٍّ” (ហើយធ្វើឲ្យការស្លាប់ និងការឆាប់មកដល់របស់វា គឺជាការសម្រាកសម្រាប់ខ្ញុំពីប្រការអាក្រក់ទាំងឡាយ) រួមទាំងភាពវឹកវរ ការសាកល្បង គ្រោះមហន្តរាយ ការប្រព្រឹត្តអំពើបាបនិងការភ្លេចភ្លាំង ព្រមទាំងបញ្ចប់ការលំបាកនិងបញ្ហាលោកិយ និងទទួលបាននូវការសម្រាកពីប្រការទាំងនោះ។