الشرح

ਅੱਲਾਹ ਦੇ ਨਬੀ ﷺ ਨੇ ਅੱਲਾਹ ਦੀ ਨਿਰਧਾਰਤ ਹੱਦਾਂ 'ਤੇ ਰੁਕਣ ਵਾਲਿਆਂ, ਉਸ ਦੇ ਹੁਕਮਾਂ ਦਾ ਪਾਲਣ ਕਰਨ ਵਾਲਿਆਂ, ਚੰਗੀਆਂ ਗੱਲਾਂ ਦਾ ਹੁਕਮ ਦੇਣ ਵਾਲਿਆਂ ਅਤੇ ਬੁਰਾਈ ਤੋਂ ਰੋਕਣ ਵਾਲਿਆਂ ਦੇ ਨਾਲ ਨਾਲ ਅੱਲਾਹ ਦੀ ਨਿਰਧਾਰਤ ਹੱਦਾਂ ਦੀ ਉਲੰਘਣਾ ਕਰਨ ਵਾਲਿਆਂ, ਨੇਕੀ ਦੇ ਕੰਮਾਂ ਤੋਂ ਦੂਰ ਰਹਿਣ ਵਾਲਿਆਂ ਅਤੇ ਬੁਰੇ ਕੰਮ ਕਰਨ ਵਾਲਿਆਂ ਦੀ ਇੱਕ ਅਨੋਖੀ ਮਿਸਾਲ (ਉਦਾਹਰਣ) ਪੇਸ਼ ਕੀਤੀ ਹੈ ਅਤੇ ਸਮਾਜ 'ਤੇ ਪੈਣ ਵਾਲੇ ਇਸ ਦੇ ਪ੍ਰਭਾਵ ਨੂੰ ਸਮਝਾਇਆ ਹੈ। ਆਪ ﷺ ਨੇ ਮਿਸਾਲ ਦਿੰਦੇ ਹੋਏ ਸਮਝਾਇਆ ਹੈ ਕਿ ਮੰਨ ਲਵੋ ਕੁੱਝ ਲੋਕ ਇੱਕ ਕਿਸ਼ਤੀ (ਬੇੜੀ) 'ਤੇ ਸਵਾਰ ਹੋਏ ਅਤੇ ਇਸ ਗੱਲ ਲਈ ਪਰਚੀ ਕੱਢੀ ਕਿ ਕੌਣ ਕਿਸ਼ਤੀ ਦੇ ਉੱਪਰਲੇ ਹਿੱਸੇ ਵਿੱਚ ਬੈਠੇਗਾ ਅਤੇ ਕੌਣ ਹੇਠਲੇ ਹਿੱਸੇ ਵਿੱਚ। ਸੋ, ਕੁੱਝ ਲੋਕਾਂ ਨੂੰ ਉੱਪਰਲਾ ਹਿੱਸਾ ਮਿਲਿਆ ਅਤੇ ਕੁੱਝ ਨੂੰ ਹੇਠਲਾ। (ਕਿਉਂ ਜੋ ਪਾਣੀ ਦਾ ਪ੍ਰਬੰਧ ਕਿਸ਼ਤੀ ਦੇ ਉੱਪਰਲੇ ਹਿੱਸੇ ਵਿੱਚ ਸੀ, ਇਸ ਲਈ) ਹੇਠਲੇ ਹਿੱਸੇ ਵਾਲਿਆਂ ਨੂੰ ਜਦੋਂ ਪਾਣੀ ਦੀ ਲੋੜ ਪੈਂਦੀ, ਤਾਂ ਉਨ੍ਹਾਂ ਨੂੰ ਉੱਪਰਲੇ ਹਿੱਸੇ ਵਾਲਿਆਂ ਦੇ ਕੋਲੋਂ ਹੋ ਕੇ ਲੰਘਣਾ ਪੈਂਦਾ ਸੀ। ਅਜਿਹੀ ਹਾਲਤ ਵਿੱਚ ਹੇਠਲੇ ਹਿੱਸੇ ਵਾਲਿਆਂ ਨੇ ਸੋਚਿਆ ਕਿ ਪਾਣੀ ਹਾਸਲ ਕਰਨ ਲਈ ਜੇਕਰ ਹੇਠਲੇ ਹਿੱਸੇ ਵਿੱਚ ਇੱਕ ਛੇਕ ਕਰ ਲੇਈਏ ਤਾਂ ਵਧੇਰੇ ਚੰਗਾ ਹੋਵੇਗਾ। ਇੰਜ ਕਰਨ ਨਾਲ ਅਸੀਂ ਉੱਪਰ ਵਾਲਿਆਂ ਨੂੰ ਤਕਲੀਫ ਦੇਣ ਤੋਂ ਬਚ ਸਕਦੇ ਹਾਂ। ਹੁਣ, ਅਜਿਹੀ ਸਥਿਤੀ ਵਿੱਚ ਜੇਕਰ ਉੱਪਰ ਵਾਲਿਆਂ ਨੇ ਹੇਠਲੇ ਹਿੱਸੇ ਵਾਲਿਆਂ ਦਾ ਹੱਥ ਨਾ ਫੜਿਆ ਅਤੇ ਉਨ੍ਹਾਂ ਨੂੰ ਛੇਕ ਕਰਨ ਤੋਂ ਨਾ ਰੋਕਿਆ, ਤਾਂ ਕਿਸ਼ਤੀ ਡੁੱਬ ਜਾਵੇਗੀ ਅਤੇ ਸਭ ਲੋਕ ਬਰਬਾਦ ਹੋ ਜਾਣਗੇ। ਲੇਕਿਨ ਜੇਕਰ ਉਨ੍ਹਾਂ ਦਾ ਹੱਥ ਫੜ ਲਿਆ, ਤਾਂ ਸਭ ਲੋਕ ਬਚ ਜਾਣਗੇ।