الشرح

Mwene Mas'uudi yavuze ati: Intumwa y'Imana Allah (nyakugira amahoro n'impuhwe z'Imana Allah) yaratwiganiye ikaba ari na yo mvugakuri mu vyo ishikiriza, ishigikiwe n'Imana Allah Nyenuguhabwicubahiro nta ngere mu vyo ivuga, yavuze iti: Mu vy'ukuri iremwa ry'umwe wese mu muri mwebwe, riba mu kwegeranya intanga, ku buryo iyo umugabo aranguranye amabanga y'abubatse n'umukenyezi wiwe asesera intanga ziwe zigasanzara mu gitereko, maze zikegeranywa muri nya gitereko zikaba ima rimwe ry'intanga mu kiringo c'imisi mirongo ine, hanyuma rya ma ry'intanga rigacika akamanyu k'amaraso avuze mu kindi kiringo kigira kabiri c'imisi mirongo ine, hanyuma ka kamanyu k'amaraso avuze kagacika akamanyu k'inyama kangana n'inyama umuntu yosemura n'amenyo mu kindi kiringo ca gatatu c'imisi mirongo ine, ico kiringo kigira gatatu rero kirangiye, mu nyuma Imana Allah Ica Imurungikira umumalayika agahuhira muri nya kamanyu k'inyama inkomoko y'ubuzima "Roho", agategekwa n'Imana Allah kwandika amajambo ane ku vyagezwe kuri we, na yo akaba ari: Ibizomubeshaho, na vyo bikaba ari birya vyose bijanye n'inema azoronka mu buzima bwiwe bwose, imyaka azobaho, na co kikaba ari kirya kiringo c'imyaka azobaho kw'isi, ibikorwa azokora ivyo ari vyo, n'uko rero azobaho mu magorwa canke mu mahirwe. Umuvugishwamana (nyakugira amahoro n'impuhwe z'Imana Allah) yararahiye ko mu vy'ukuri umuntu ashobora gukora ibikorwa vyiza vy'abantu bo mu Bwami bw'ijuru mu vyo abantu bibaza, agashishikara uko kugeza n'aho ata gisigaye kiri hagati yiwe n'Ubwami bw'ijuru ngo abwinjire, kiretse intambwe nto ireha n'uburebure bw'ukuboko gushika mu nkokora, bisigura ko ata kiba gisigaye ngo ashikire Ubwami bw'ijuru kiretse intambwe ntoya cane umuntu yogereranya n'uburebure bw'ukuboko gushika mu nokora; kugira ashike iyo aroye, yamara rero hagaca higanza ivyanditswe vyagezwe kuri we, ico gihe agasanga asozereye ubuzima bwiwe mu gukora ibikorwa vy'abantu bo mu muriro, agaca awinjira; kuko igisabwa kugira igikorwa cemerwe, ni ukwamizako igikorwa gushika gupfa. Hakaba rero n'uwundi muntu ashobora gukora ibikorwa bibi vy'abantu bo mu muriro mu vyo abantu bibaza, agashishikara uko kugeza n'aho ahakwa kwinjira mu muriro, nk'aho hagati yiwe n'umuriro hoba hasigaye intambwe ntoya cane ireha n'uburebure bw'ukuboko gushika mu nkokora, kugira umuntu ashike iyo aroye, yamara hagaca higanza ivyanditswe vyagezwe kuri we, ico gihe agasanga asozereye ubuzima bwiwe mu gukora ibikorwa vyiza vy'abantu bo mu Bwami bw'ijuru, agaca bwinjira.