الشرح

ព្យាការី (ស.អ.វ) បានទូន្មានដល់សាហាហ្ពាត់ទាំងឡាយដោយពាក្យទូន្មានដ៏មានអត្ថន័យជ្រាលជ្រៅ ដែលធ្វើឱ្យចិត្តភ័យខ្លាច និងភ្នែកហូរទឹកភ្នែក។ សហាហ្ពាត់ទាំងឡាយបាននិយាយថា៖ "ឱរ៉សូលលុលឡោះ! ហាក់បីដូចជាពាក្យទូន្មានចុងក្រោយ" ដោយសារពួកគេឃើញពីការខិតខំប្រឹងប្រែងរបស់ព្យាការីក្នុងការទូន្មាន។ ពួកគេបានស្នើសុំអនុសាសន៍ដើម្បីប្រកាន់ខ្ជាប់បន្ទាប់ពីព្យាការី។ ព្យាការីមូហាំម៉ាត់មានប្រសាសន៍ថា៖ "ខ្ញុំសូមទូន្មានអ្នកទាំងអស់ឱ្យកោតខ្លាចចំពោះអល់ឡោះ តាមរយៈការប្រព្រឹត្តកិច្ចការចាំបាច់ និងជៀសវាងអ្វីដែលហាមឃាត់។ ត្រូវស្ដាប់បង្គាប់និងគោរពតាម មានន័យថា ចំពោះអ្នកដឹកនាំ ទោះបីជាទាសករម្នាក់ក្លាយជាអ្នកដឹកនាំលើអ្នកក៏ដោយ មានន័យថា បើទោះបីជាមនុស្សទាបបំផុតក្លាយជាមេដឹកនាំរបស់អ្នក កុំបដិសេធការគោរពតាមគាត់ ដោយខ្លាចការកើតមានចលាចល។ ព្រោះអ្នកណាដែលនៅរស់ក្នុងចំណោមពួកអ្នក នឹងឃើញការខ្វែងគំនិតគ្នាជាច្រើន។ បន្ទាប់មក ព្យាការីបានបង្ហាញពួកគេពីដំណោះស្រាយចំពោះការខ្វែងគំនិតគ្នានេះ តាមរយៈការប្រកាន់ខ្ជាប់នូវសុណ្ណះរបស់គាត់ និងសុណ្ណះរបស់ខូឡាហ្វាអៀរ៉ស្ហ៊ីទីន អាល់មះទីយីនបន្ទាប់ពីគាត់ គឺ អាពូហ្ពាកើត អាស់ស្ហិទិក, អ៊ូម៉ើត ពិន ខហ្តប, អ៊ូស្មាន ពិន អាហ្វាន និងអាលី ពិន អាពូតឡឹប សូមព្រះអល់ឡោះពេញចិត្តនឹងពួកគាត់ទាំងអស់។ និងខាំដោយធ្មេញថ្គាម មានន័យថា ត្រូវប្រកាន់ខ្ជាប់យ៉ាងម៉ឺងម៉ាត់នូវសុណ្ណះ និងប្រតិបត្តិតាមវា។ ព្យាការីបានព្រមានពួកគេអំពីការបង្កើតថ្មីនិងពិតហ្អះក្នុងសាសនាអ៊ីស្លាម ព្រោះរាល់ពិតហ្អះទាំងអស់គឺជាទង្វើដែលវង្វេង។