الشرح

(هیچ ڕۆژێک نییە کە ئەنجامدانی کردەوەی چاک خۆشەویست بێت لای خوای گەورە وەکو ئەم ڕۆژانە): واتە: دە ڕۆژی یەکەمی مانگی ذي الحجة، ووترا: ئەی پێغەمبەری خودا تەنانەت جیهاد وتێکۆشانیش لە پێناو خوای گەورە؟ فەرمووی: (تەنانەت جیهاد وتێکۆشانیش لە پێناو خوای گەورە، جگە لە پیاوێک نەبێت کە بە نەفسی وهەموو ماڵی دەرچوو بێت، وبە هیچ لە ئەوانە نەگەڕابێتەوە)، (کردەوەی چاک) نوێژ وخێرکردن وڕۆژوو ویادی خوای گەورە وخوێندنی قورئان وچاکەکاری بەرامبەر دایک وباوک وگەیاندنی پەیوەندی خزمایەتی وچاکەکاری بەرامبەر خەڵکی وچاکبوون لە گەڵ دراوسێ وجگە لەمانە لە کردەوە چاکەکان دەگرێتەوە، بۆیە سوننەتە دە ڕۆژی یەکەمی مانگی ذي الحجة بەڕۆژوو بیت چونکە دەچێتە ڕیزی کردەوە چاکەکانەوە ومەبەست ئەوەیە کە ڕۆژی دەیەم ناگرێتەوە چونکە یەکەم ڕۆژی جەژنە، ونەهی کراوە لە ڕۆژووگرتن لە ڕۆژی جەژندا. وئەم فەرموودە بەڵگەیە لە سەر فەزڵ وپاداشتی کردەوە چاکەکان لەو دە ڕۆژەدا، وهەروەها فەرموودەکە بەڵگەیە لە سەر ئەوەی کە جیهاد کردن لە چاکترین کردەوەکانە، بۆیە صەحابە فەرموویان: (تەنانەت جیهاد وتێکۆشانیش لە پێناوی خوای گەورە)، وهەروەها بەڵگەیە لە سەر فەزڵی ئەم حاڵەتە دەگمەنە کە کەسێک دەربچێت بۆ جیهاد کردن لە پێناو خوای گەورە بە نەفس وماڵی خۆی (ماڵی خۆی: مەبەست چەک وسوارییەکەیەتی) کە بکوژرێت وچەک وسوارییەکەی ببرێت لە لایەن دوژمنەوە، ئەم کەسە نەفس وماڵی خۆی لە دەستدا لە پێناو خوای گەورە بۆیە ئەمە باشترین موجاهیدە، بۆیە ئەم کردەوەیە باشترە لە کردەوەی چاک لە دە ڕۆژی یەکەمی مانگی ذي الحجة، وئەگەر ئەم حاڵەتە ڕوویدا لە دە ڕۆژی یەکەمی مانگى ذي الحجة دا ئەوا پاداشت وفەزڵەکەی چەند جار زیاد دەبێت.