الشرح

Nabiyaamã (Wẽnd pʋʋsg la A tɩlgr be a yĩngɑ) a vẽnega n wilga arzεkã kõbg toor-toore, la a vẽneg n wĩnig ned ning sẽn ka kõ a Zak rolbo dũni yikr raarã. Lɑ sẽn be b pʋgẽ: Rẽenemã : yaa sãnem la wanzuri la bũmb ning sẽn wõnd b yiibã, sẽn yaa arzεgse la lallgo, la bũmb ning Zak sẽn yaa tɩlae, tɩ b ka yãk-a n kõ, rẽnd sã n ta dũni yikr raarã, b yẽnegd-a lame n yõog-a (t'a yaa wala walse (rapεgdo), tɩ b rɩk-a n wɩng Gεhannem Bugmã pʋga, n rɩk-a n sɩbg a soabã ne-a, n bẽes a lʋgã la a rĩirã la a poorã, a sẽn maag fãa la b sẽn lebgd n wɩng-a, tɩ ninsaalã kell n duum ne halhaal-kãngã sẽn yɑɑ nongã, dũni wã yikri raar woglem sẽn ta yʋʋm pis-nu tõre, halɩ tɩ b wa bʋ bõn-naandsã ne taab sʋka, t'a yi arzãn ned maa Bugum neda. Yiib soabã: yaa yʋgma soab sẽn ka yãkd a Zak la b hakε wã n kõ, la sẽn be a hakε wã pʋgẽ, yaa b pẽ-ba n kõ neb nins sẽn na n wa sẽn yaa nimbaan-nebã, rẽnd b na n talla yʋgem-kãensã n wa tɩ b yaa bεda n nobe, tɩ b waooglem yɩɩd b sẽn da yaa to-to dũnu wã. Tɩ b yεdg-ba n sẽeg-ba dũni yikr raarã, tẽng sẽn yaa yalenga n zems taaba, n gãneg a soabã beenẽ tɩ b tabd-a ne b nao wã la b rũmd-a ne b yẽnã, b baasgã sã n sε la b sɩngrã lebd n sɩnge, yẽ me na n dũuma halhaal-kãngã zugu, sẽn yaa nongã, dũni yikr raarã woglemã zãnga, sẽn ta yʋʋm pis-nu wã, halɩ tɩ Wẽnd wa bʋ nebã ne taab sʋka, t'a yaool n yi n yaa arzãn neda maa Bugum. Tãab soabã: yaa niis la rũms soaba -piis la bʋʋse- soab sẽn ka kõta Zak sẽn yaa tɩlae n zao-a wã, b na n waa ne bãmbã tɩ b pidame, tɩ b sõorã yɩɩd a sẽn rag n yaa a soabã, baa fʋɩ ka boogd a pʋgẽ, b na n yεdg-b lame n rɩk a soabã n lob beenẽ dũni yikr raare, n gãneg-a tẽn-yaleng zug sẽn yaa zĩ-peellã, niisã maa rũmsã pʋgẽ yɩɩl-gond ka be ye, yɩɩl sẽn kaoog ka be, b fãa gillã yɩɩlã pidame tɩ b sɩfã pidi, tɩ b tã yẽnda ne b yɩɩlã la b tab-a ne b nao wã, b baasgã sã n wa tab n sε la b sɩngrã sẽn leb n sɩngdẽ, n kell n duum halhaal-kãngã pʋgẽ, sẽn yaa nangã, dũni yikr raare yalsgã, woglem sẽn yaa yʋʋm pis-nu wã, halɩ tɩ b wa bʋ bõn-naandsã ne taab sʋka, t'a yɩ arzãn neda maa Bugum neda. Tãab soabã: yaa wiidi wã tarda, la wiidi wã yaa kõbg a tãabo: Rẽenemã: b yaa zũnuub ne a soabã, a sã n rɩk wiidã n maan maan-tɩ-b-yã la puglgu la tall n zab ne lɩslaamdã nebã. Yiib soabã: b yɩta sʋtr ne a soabã, ne ned ning sẽn rɩk b n zabd gɩhaadɩ Wẽnd sorã pʋgẽ, rẽ poorẽ t'a maneg n zã-b sõma, n wãbne-b sõma n yik ne b yεlã fãa, sẽn be a pʋgẽ, yaa a bas tɩ b rʋʋdsã rʋʋdẽ. Tãab soabã: b yɩta keoor ne-a, ne ned ning sẽn rɩk-b tɩ yaa gɩhaadɩ n na n zab Wẽnd sorã pʋgẽ, n sõng lɩslaamdã, la a bas-b tɩ be bãoogẽ la moogẽ n wãbdẽ, a ka tar sẽn na n wãbe, rẽndame tɩ b gʋls a wãbrã sõore tɩ yaa keoore n kõ a soabã, la b leb n gʋls n kõ-a b bĩndã la b rʋʋdmã sõore tɩ yaa yel-sõmde, a ka tar a sẽn na n wãag a wĩirã n bas-b tɩ b zoe n kẽng yɩɩg n tʋg n wãb yamdã n gilgi, rẽndame tɩ Wẽnd gʋls a vũunã sõorã la b bĩndã tɩ yaa yel-sõmde n kõ-a. B soabã ka tar a sẽn na n pɩʋʋg ne-ba kʋɩlgẽ tɩ b yũ, a ka tara a sẽn rat n na n yũnug-ba rẽndame tɩ Wẽnd gʋls yũubã sõor yel-sõmd n kõ-a. Rẽ poorẽ tɩ b sok Nabiyaamã (Wẽnd pʋʋsg la A tɩlgr be a yĩngɑ) bõeesã yelle, bãmb me yaa wala wiidi wã bɩɩ? Rẽnd a yeelame: tɩ bʋʋd ka sig n welg tɩ yaa yẽ, sã n ka Aayar-kãngã to sẽn pɑoodã, a yaa sẽn gũbg tũudmã la Wẽnd kɩɩsg kõbg toor-toore, yẽ me la Wẽnd koεεg sẽn yeele: {Rẽnd ned ning sẽn wa n tʋma sẽn paood to-to fãa, tɩ yaa sõma, a yãt-a lame, lɑ ned ning sẽn wɑ n tʋmɑ tɩ yɑɑ wẽng to-to fãa ɑ yẽtɑ lɑme} [ Azzalzala : 8], rẽnd ned ning sẽn wa n tʋg n tʋm bõeesã zãabẽ, sẽn yaa tũudum, a yãta a yel-sõmde, la ned ning sẽn wa n tʋm a pʋgẽ Wẽnd kɩɩsgo, a yãta yẽ me sɩbgre, la woto gũbga tʋʋmã gilli.