فوائد الحديث

ڕۆژووگرتنی سێ ڕۆژ لە هەموو مانگێك وەكو ڕۆژووگرتنی هەموو ساڵەكە وایە، چونكە چاكە بە دە هێندەیە، بۆیە ئەو سێ ڕۆژە دەبن بە سی ڕۆژ، ئەگەر لە هەموو مانگێك سێ ڕۆژ بەڕۆژوو بێت ئەوا وەكو ئەوە وایە ساڵەكە هەمووی ڕۆژووی گرتبێت.

لە شێوازەکانى بانگەوازى کردن بۆ لای خواى گەورە؛ هاندان بۆ ئەنجامدانی کردەوەى چاک وباسی پاداشت لەسەر ئەو کردەوەیە، وبە بیرهێنانەوەى پاداشت لەسەر بەردەوامبوون لەسەر ئەو کردەوەیە.

خەتابی دەڵێت: پوختەی باسەكەی عبد اللەی كوڕی عەمرو ئەمەیە؛ خوای گەورە -سبحانه وتعالی- فەرمانی نەكردووە بە پەرستنی ئەو تەنها لە ڕێگای ڕۆژووگرتنەوە، بەڵكو جۆرەكانی پەرستن زۆرن، ئەگەر هەموو هەوڵ وكۆششی بۆ ڕۆژووگرتن تەرخان بكات ئەوا لە پەرستنەكانی تر كەمتەرخەم دەبێت، بۆیە باشتر وایە مامناوەند بێت لە ڕۆژووگرتندا بۆئەوەی هێزی بمێنێتەوە بۆ ئەنجامدانی پەرستنەكانی تر، وئاماژە بۆ ئەم خاڵە كراوە كاتێك پێغەمبەر -صلى اللە علیە وسلم- سەبارەت بە داود -علیه السلام- فەرمووی: «وڕای نەدەكرد ئەگەر بوەستایە بەرامبەر بە دوژمن»؛ چونكە بە ڕۆژوو نەگرتن بەهێز دەبوو بۆ ئەنجامدانی جیهاد.

نەهی كردن لە قووڵبوونەوە وزۆر لەخۆكردن لە پەرستندا، وخێر وچاكە هەموی لە پابەند بوونە بە سوننەتەوە.

مەكروهە هەموو ڕۆژەكانی ساڵ بەڕۆژوو بێت؛ وئەمیش مەزهەبی زۆرینەی زانایانە، ودەبێتە حەرام ئەگەر بارگرانی بخاتە ئەستۆی خۆی وزیانی پێبگەیەنێت وزۆر لەخۆی بكات، وئەمە پشت كردنە لە سوننەتی پێغەمبەر -صلى اللە علیە وسلم-، وباوەڕی وایە جگە لە سوننەتی ئەو باشترە.