الشرح

ယေဘုယျ စည်းမျဉ်းတစ်ချက်မှာ အလ္လာဟ်အရှင်မြတ်နှင့် အရှင်မြတ်၏ ရစူလ်တမန်တော်က (ဟလာလ်) ခွင့်ပြုထားသောအရာများနှင့် (ဟရာမ်) တားမြစ်ထားသော အရာများသည် ရှင်းလင်း ထင်ရှားပေသည်။ မွတ်စ်လင်မ်တို့အတွက် အမှန်ပင် စိုးရိမ်စရာကိစ္စမှာ သံသယဖြစ်ဖွယ်ကိစ္စရပ်များဖြစ်သည်။ ထိုသံသယဖြစ်ဖွယ်ရာများကို စွန့်လွှတ်လိုက်သူသည် ဟရာမ် ထဲသို့ကျရောက်ခြင်းမှ ကင်းဝေးကာ မိမိသာသနာနှင့်ပတ်သက်၍ ငြိမ်းချမ်းမှုရရှိသွားမည်ဖြစ်သည်။ ထိုသံသယဖြစ်ဖွယ်ကိစ္စကို ကျူးလွန်မိသည့်အတွက် လူများ၏ ပြစ်တင်ပြောဆိုခြင်းမှလည်း မိမိ၏သိက္ခာကို ထိန်းသိမ်းရာ ရောက်ပေသည်။သံသယဖြစ်ဖွယ်ရာများကို မရှောင်ကြဥ်သူသည် မိမိကိုယ် မိမိ ဟရာမ် ထဲသို့ကျရောက်အောင်၊ သို့မဟုတ် လူတို့၏ အတင်းပြောခံရပြီး၊ မိမိ၏သိက္ခာကို ထိပါးစော်ကားခံရအောင် လုပ်လိုက်ခြင်းပင်ဖြစ်သည်။ တမန်တော်မြတ်(ဆွလ္လလ္လာဟုအလိုင်ဟိဝစလ္လမ်)က သံသယဖြစ်ဖွယ်ရာများကို ကျူးလွန်သောသူအား မြေပိုင်ရှင်က တားမြစ်ထားသော နယ်မြေအနီး၌ မိမိ၏ ကုလားအုတ် သို့မဟုတ် သိုး၊ ဆိတ်တို့ကို ကျောင်းသည့် ဆိတ်ကျောင်းသားနှင့်တူသည်ဟု ပမာပေးထားတော်မူသည်။ သို့ဖြစ်၍ ထိုဆိတ်ကျောင်းသား၏ တိရစ္ဆာန်များသည် ၎င်းတားမြစ်ထားသော နယ်မြေနှင့် နီးကပ်နေသောကြောင့် ထိုနယ်မြေထဲသို့ ရောက်လုနီးပါးဖြစ်သွားသည်။ ဤနည်းအတိုင်းပင် သံသယဖြစ်ဖွယ်ရာများကို ကျူးလွန်သူသည် ထိုသို့ကျူးလွန်လိုက်သည့်အတွက် ထင်ရှားသော ဟရာမ်နှင့် နီးကပ်သွားပြီး ၎င်းသို့ ကျရောက်လုနီးပါး ဖြစ်သွားပေသည်။တမန်တော်မြတ် (ဆွလ္လလ္လာဟုအလိုင်ဟိဝစလ္လမ်)က ညွှန်ကြားပြသတော်မူခဲ့သည်မှာ အမှန်တကယ်ပင် အတွင်းပိုင်းဆိုင်ရာ (အအ်မာလ်)လုပ်ဆောင်ချက်များ ကောင်းသည်၊ ဆိုးသည်ကို အပြင်ပိုင်းဆိုင်ရာ (အအ်မာလ်)လုပ်ဆောင်ချက်များက ဖော်ပြနေသည်။ ၎င်းကို ကိုယ်တော်က ရှင်းပြခဲ့သည်မှာ ခန္ဓာကိုယ်ထဲတွင် အသားတုံးတစ်တုံး(နှလုံးသား) ရှိပြီး ၎င်းမှန်ကန်နေသ၍ ခန္ဓာကိုယ်လည်း မှန်ကန်ကောင်းမွန်နေမည်ဖြစ်သည်။ ၎င်းပျက်စီးသွားပါက ခန္ဓာကိုယ်လည်း ပျက်စီးသွားမည်ဖြစ်သည်။