الشرح

အစ္စလာမ်သာသာနာသည် ဖုံးကွယ်နေသော(ရှိရ်က်) ဖက်စပ်ယှဉ်တွဲ ကိုးကွယ်မှုနှင့် ပေါ်လွင်ထင်ရှားသော (ရှိရ်က်) ဖက်စပ်ယှဉ်တွဲ ကိုးကွယ်မှုတို့ကို ဖြစ်ပေါ်စေမည့် အကြောင်းခံအားလုံးကို တားမြစ်ပိတ်ပင်ရန်လိုလားသည်။ အလီ (ရဿွိယလ္လာဟုအန်ဟု)က ကျွန်တော်တို့အား ပြောပြခဲ့သည်မှာ အလ္လာဟ်အရှင်မြတ်၏ ရစူလ်တမန်တော် (ဆွလ္လလ္လာဟုအလိုင်ဟိဝစလ္လမ်)က သူ့အားစေလွှတ်၍ တွေ့သမျှ ရုပ်ပုံတိုင်းအား ဖျက်ဆီးပစ်ရန် အမိန့်ပေးတော်မူခဲ့သည်။ အဘယ်ကြောင့်ဆိုသော် ထိုအရာများသည် အလ္လာဟ်အရှင်မြတ်၏ ဖန်ဆင်းမှုနှင့် တူဆင်အောင်ပြုလုပ်ခြင်းဖြစ်ပြီး၊ ၎င်းတို့ကို ဂုဏ်ပေးလေးစားခြင်းဖြင့် (ဖိသ်နဟ်) ပြဿနာများ ဖြစ်ပေါ်စေပြီး ထိုသို့ပြုလုပ်သူအား ရုပ်ထုကိုးကွယ်မှုသို့ ကျရောက်စေမည်ဖြစ်သည်။ ထို့အတူ ကိုယ်တော်သည် သူ့အား ကဗရ်သင်္ချိုင်းများပေါ်ရှိ အဆောက်အဦးများနှင့်သာသနာကခွင့်ပြုထားသည်ထက် ပိုမြင့်သော ကဗရ်သင်္ချိုင်းများကို ဖြိုချပစ်ရန်လည်း အမိန့်ပေးတော်မူခဲ့သည်။ အဘယ်ကြောင့်ဆိုသော် သင်္ချိုင်းများကို မြှင့်တင်ခြင်းသည် သင်္ချိုင်းအတွင်းရှိသူများနှင့်ပတ်သက်၍ (ဖိသ်နဟ်) ပြဿနာများ ဖြစ်ပေါ်စေပြီး ဂုဏ်ပေးလေးစားခြင်းနှင့် ခဝပ်ကိုးကွယ်ခြင်းတို့တွင် ၎င်းတို့အား အလ္လာဟ်အရှင်မြတ်နှင့် ဖက်စပ်ယှဉ်တွဲ ကိုးကွယ်သူများအဖြစ် ပြုလုပ်လိုက်မည်ဖြစ်သည်။ ထိုသို့စေခိုင်းရခြင်းမှာ မွတ်စ်လင်မ်များ ၎င်းတို့၏ သာသနာပေါ်တွင် မြဲမြံစွာရှိနေကြရန်နှင့် ၎င်းတို့၏ ယုံကြည်ချက် သန့်ရှင်းစေရန်အတွက်ဖြစ်သည်။ အဘယ်ကြောင့်ဆိုသော် ရုပ်ပုံများပြုလုပ်ခြင်းနှင့် ကဗရ်သင်္ချိုင်းများကို မြှင့်တင်ဆောက်လုပ်ခြင်းသည် ထိုအရာများကို ဂုဏ်ပေးခြင်း၊ အလေးအမြတ်ထားခြင်း၊ ၎င်းတို့၏ အဆင့်အတန်းထက် ပို၍ ချီးမြှောက်ခြင်း၊ အလ္လာဟ်အရှင်မြတ်နှင့်သာ သက်ဆိုင်သည့် အခွင့်အရေးအား ၎င်းတို့ကို ပေးအပ်လိုက်ခြင်းစသည်တို့ကို ဖြစ်ပေါ်စေသည်။