الشرح

Mtume -chanasa ni utendele wa Mlungu iwe pa jwelejo-wasalilaga wakulijiganya wakwe ya sambi syekulungwa mnope, ni wakolasile sambi sitatusi: 1. Kumpwatikanya Mlungu ni ikandu ine: kwakuli kamula masengo galigose gambone pakusaka kumsangalasya jumkanawa Mlungu, nikuilandanya yamkaniyiwa Mlungu ni Mlungu pa ujikape wakwe wakupopeledwa, mu itendo yakwe, mu mena gakwe nambo soni mbili syakwe. 2. Kunyosya achinangolo wawili: kwele nikutenda chindu chilichose chakwapa nacho ilagasyo achinangolo wawili,kanga malowe kapena chitendo, nikuleka kwatendela yambone achinangolowo. 3. Kuwecheta malowe ga unami, mkati mwakwe mwana kuwichila umboni wa unami: gele ni malowe galigose gagambakulinganya gaunami gakusawa ni chakulinga chakumtenda kuwa jwakunyosekwa mundu jwakumlambuchisyajo pakusaka kumjigalila ipanje yakwe kapena kusaka kumnyosya ya uchimbichimbi wakwe ni ine yakulekangana lekangana. Mtume -chanasa ni utendele wa Mlungu iwe pa jwelejo-wawilisye pakulekasya ya mteto wakuwecheta ya unami pakusaka kwagumbalisya wandu wakunyalaya kwa mteto welewu nambo soni ligongo lya yakuichisya yakusakala yaikusawaga mu dela jakutama wandu, mpaka wakulijiganya wa Mtume wawechete kuti: basi Mtume akatame ji aleche kuwechetako; pakumtendela chanasa Mtumejo kuti wawilisye kakwanila yakulekasya unamiyo, ni kunyalaisidwa kuti yele imsungusye Mtume ya ndamo jeleji.