الشرح

ណាពី ﷺ លោកបានប្រាប់ពីឋានៈរបស់លោកនៅឯអល់ឡោះជាម្ចាស់ ហើយថាវាបានឈានដល់កម្រិតកំពូលនៃសេចក្តីស្រឡាញ់ ដូចដែលណាពីអ៊ីព្រហ៊ីមបានទទួល។ ដូច្នោះហើយទើបលោកបានបដិសេធក្នុងការមានអ្នកជាទីស្រឡាញ់សម្រាប់រូបលោកក្រៅពីអល់ឡោះជាម្ចាស់ ដោយសារដួងចិត្តរបស់លោកពេញទៅដោយសេចក្ដីស្រឡាញ់ ការលើកតម្កើង និងការស្គាល់អល់ឡោះ។ ដូច្នេះ វាគ្មានកន្លែងទូលាយសម្រាប់អ្នកណាផ្សេងទៀតក្រៅពីអល់ឡោះនោះឡើយ។ ហើយប្រសិនបើលោកអាចជ្រើសរើសយកមនុស្សម្នាក់ក្នុងចំណោមមនុស្សលោកធ្វើជាអ្នកជាទីស្រឡាញ់របស់លោកនោះ ប្រាកដជាលោកនឹងជ្រើសយកអាពូហ្ពាកើរ رضي الله عنه ជាមិនខាន។ បន្ទាប់មក លោកបានព្រមានពីការបំពានព្រំដែនដែលគេអនុញ្ញាតពាក់ព័ន្ធនឹងក្ដីស្រឡាញ់ ដូចដែលពួកយូដា(យ៉ាហ៊ូទី) និងពួកគ្រឹស្ទាន(ណាសរ៉នី)បានធ្វើចំពោះផ្នូររបស់បណ្តាណាពី និងកុសលបុគ្គលទាំងឡាយរបស់ពួកគេ រហូតដល់ពួកគេប្រែក្លាយអ្នកទាំងនោះទៅជាព្រះគោរពបូជាក្រៅពីអល់ឡោះ ជាម្ចាស់ ហើយបានសាងសង់ម៉ាស្ជិត និងវិហារនៅលើផ្នូររបស់អ្នកទាំងនោះ។ ហើយណាពី ﷺ លោកបានហាមឃាត់ប្រជាជាតិរបស់លោកមិនឲ្យធ្វើដូចពួកគេឡើយ។