فوائد الحديث

ﷲ ތަޢާލާގެ ރަޙްމަތާއި އެކަލާނގެ ފުއްސެވުމާއި ދަރުމައިގެ ތަނަވަސްކަމެވެ.

ތައުޙީދުގެ މާތްކަމެވެ. އަދި ތައުޙީދުގެ އަހުލުވެރިންނަށް ﷲ ފާފަތަކާއި އުރެދުންތައް ފުއްސަވާދެއްވާކަމެވެ.

ޝިރުކުގެ ނުރައްކާތެރިކަމާއި، ޝިރުކުކުރާ މުޝްރިކުންނަށް ﷲ ފާފަ ފުއްސަވާ ނުދެއްވާ.

އިބްނު ރަޖަބު ވިދާޅުވިއެވެ: މި ޙަދީޘްގައި ފާފަފުއްސެވުން ލިބޭނެ ތިން ސަބަބު ހިމެނިގެންވެއެވެ. ފުރަތަމައީ: ރަޙްމަތަށް އެދުމާއެކު ދުޢާކުރުމެވެ. ދެވަނައީ: ފާފަފުއްސެވުމަށް އެދުމާއި ތައުބާވުމެވެ. ތިންވަނައީ: ތައުޙީދުގެ މަތީގައި މަރުވުމެވެ.

މިއީ ނަބިއްޔާ ﷺ އެކަލޭގެފާނުގެ ވެރި ރައްބުގެ ޙަޟްރަތުން ރިވާކުރައްވާ ޙަދީޘެކެވެ. އަދި މިއަށް ޤުދުސީ ނުވަތަ އިލާހީ ޙަދީޘޭ ކިޔެއެވެ. އެއީ އޭގެ ލަފްޒާއި މާނަ ﷲ ގެ ޙަޟްރަތުންވާ ޙަދީޘެވެ. އެކަމަކު އެހެން އެއްޗެއްސަށް ނުލިބި ޤުރްއާނަށް ޚާއްޞަވެގެންވާ ކަންކަންކަމުގައިވާ: ތިލާވަތުކޮށްގެން އަޅުކަންކުރުމާއި، ކިޔެވުމަށްޓަކައި ޠާހިރުވެގަތުމާއި، ގޮންޖެއްސެވުމާއި، މުޢުޖިޒާތަކަށްވުމާއި އެނޫންވެސް އެފަދަ ކަންކަން އޭގައި ނުވެއެވެ.

ފާފަތައްވަނީ ތިން ވައްތަރަކަށެވެ: ފުރަތަމައީ: ﷲ އާ ޝަރީކުކޮށް އެހެން ފަރާތްތައް ބައިވެރިކުރުމެވެ. މިއީ (މަރުވުމަށްފަހު) ﷲ ނުފުއްސަވާ ފާފައެކެވެ. ﷲ ޢައްޒަ ވަޖައްލަ ވަޙީކުރެއްވިއެވެ: ﴿إِنَّهُۥ مَن يُشۡرِكۡ بِٱللَّهِ فَقَدۡ حَرَّمَ ٱللَّهُ عَلَيۡهِ ٱلۡجَنَّةَ وَمَأۡوَىٰهُ ٱلنَّارُ...﴾ މާނައީ: "ހަމަކަށަވަރުން ﷲ އާ ޝަރިކުކޮށްފި މީހާ؛ ފަހެ އޭނާގެ މައްޗަށް ﷲ ސުވަރުގެ ޙަރާމްކުރެއްވިއެވެ. އަދި އޭނާ އުޅޭނެތަނަކީ ނަރަކައެވެ..."

ދެވަނައީ: އަޅާ އޭނާގެ އަމިއްލަ ނަފްސާއި އޭނާގެ ވެރި ރައްބާ ދެމެދުވާ ގޮތަށް އޭނާގެ އަމިއްލަ ނަފްސަށް އަނިޔާވެރިވެގެން ފާފަތަކާއި އުރެެދުންތަކަށް އަރައިގަތުމެވެ. ފަހެ ﷲ ޢައްޒަ ވަޖައްލަ އިރާދަކުރެއްވިއްޔާ އެ ހުރިހާ ފާފަތައް ފުއްސަވާ ޢަފޫދެއްވައެވެ. ތިންވަނައީ: އެއިން އެއްވެސް ކަމެއް ﷲ ތަޢާލާ ދޫ ނުކުރައްވާ ފާފަތަކެވެ. އެއީ އަޅުތަކުން އެއްބަޔަކު އަނެއްބަޔަކަށް އަނިޔާވެރިވުމެވެ. ފަހެ އެކަމުގައި ކޮންމެހެންވެސް ބަދަލު ހިފައި ޤިޞާޞް ހިފުންވެއެވެ.