الشرح

Ibn Mashuud day xibaare ne Yónente bi -yal na ko Yàlla dolli xéewal ak mucc- xamal na leen xutbay aajo, te mooy li ñuy wax bu ñuy tàmbalee wax ci xutba yi, ak ci aajo yi, niki xutbay takk ab sëy, ak xutbay àjjuma ak yeneen, Xutba gii nag dafa làmboo ay maanaa yu bari ci leeral ne Yàlla moo jagoo mbooleem xeeti cant yi, ak sàkku ndimbal ci moom dong amul bokkaale, ak suturaal bàkkaar yi te jéggale ko, ak làqu ci Yàlla ci bépp ay, ak ayi bàkkan yi ak yeneen. Yónente bi -yal na ko Yàlla dolli xéewal ak mucc- xamle na ne gindee ci loxoy Yàlla la nekk, ku mu gindi kenn manu koo sànk, ku mu sànk it kenn manu koo gindi. Mu tudd seede ci Tawhiid, ci ne amul kenn ku ñuy jaamu cig dëgg ku dul Yàlla, ak seedeg Yónent ci ne Muhammat jaamu Yàlla la di Yónenteem la. Mu jeexale xutba gi ci ñatti aaya yu làmboo digleg ragal Yàlla mu màgg mi ci def ay ndigalam te moytu ay tereem, ngir sàkku jëmmi Yàlla ji, ak ne payug ku def loolu mooy sellug ay jëf ak i wax, ak far ay ñaawtéef, ak jéggalug bàkkaar yi, ak dund gu teey ci àdduna, ak texe ca àjjana ëllëg bis-pénc.