الشرح

Mtume-chanasa ni utendele wa Mlungu iwe pa jwelejo-wateteye wandu wakwe kuti akawaga yakunyengeka ni yakuwecheta ya Ayuda ni Akilisitu mu ikandu yakuma m'mabuku gawo. Ligongo mu ndawi ja Mtume-chanasa ni utendele wa Mlungu iwe pa jwelejo-Ayuda waliji ali mkuwalanga buku ja Tora mu chiwecheto cha chi Heburu; chachili chiwecheto cha Ayuda, ni gopolelaga nu chalabu. Ni Mtume-chanasa ni utendele wa Mlungu ijaule kwa jwalakwejo-watite kuti: nkasimwakulupililaga Ayuda ni Akilisitu nambo soni nkasimwakanilaga,ali lilamusili likwayana pa ikandu yanti ngaikumanyika kuti ana yakuona ni yapi nambo soni yaunami ni yapi; Ligongo lyanti Mlungu atulamulile kuti tukulupilila mu yatulusidwe kwetuwe kupitila mu buku ja Qur'an,nambo soni iyatumisidwe kwa jemanjawo(Ayuda ni Akilisitu) kupitila mu mabuku gawo,nikuti pangali litala limpaka tumanyililile yakuona mu yakusawaga akuwecheta kutyochela mu mabukugawo mu yaili yesokonechele, naga mu malamusi getu (ga chisilamu)pangali yaikulongosola yaili yakuona ni yaunami . Ni tukusosekwa kwima kaje,ngatukusosekwa kwakulupilila mu yakuwecheta yawo; pakogopela kuti tukawa nawo imo mu ikandu ya waisindile myanjajo,nambo soni tukakanila; pakogopela kuti mwine yakuwechetayo ikwete kuwa yakuona, ni chituwa kuti tukanila ikandu yatulamwile Mlungu kuti tuikulupilile. Mtume-chanasa ni utendele wa Mlungu ijaule kwa jwalakwejo- walamwile kuti tuwecheteje kuti: {M'bechete-jenu manja wamkulupilile-kwasalila Ayuda ni Akilisitu kuti:tukulupilile mwa Mlungu jumo jwakupopeleledwa mwakuwajilwana, ni yayatumisidwe kwa kwetuwe, ni yatumisidwe kwa Abraham,Ismael,Ishaq,Ya'qub ni isukulu yakwe,ni yawapedwile Mussa ni Issah(Yesu)ni yawapedwile achimitume wane mu mabuku gakumila kwa Mlungu jwawo,ngatukulekanganya namta jumo mwa achimitume (osope tukwakulupilila), soni uwe tuwele Asilamu}. [ Al-Baqarah :136].