الشرح

တမန်တော်မြတ်(ဆွလ္လလ္လာဟုအလိုင်းဟိဝစလ္လမ်)က ရှင်းလင်းမိန့်ကြားတော်မူခဲ့သည်မှာ အကယ်၍ ဆွလာသ်ဝတ်ပြုနေသူတစ်ဦးသည် မိမိဝမ်းဗိုက်ထဲ၌ လှုပ်ရှားတစ်စုံတစ်ရာခံစားရလျှင်၊ ဝမ်းဗိုက်ထဲ၌ လေများမွှေနှောက်နေပြီး တစ်စုံတစ်ရာ ထွက်သွားခြင်း ရှိ၊ မရှိ သံသယဖြစ်ခဲ့လျှင် ထိုသူသည် မိမိဆွလာသ်ဝတ်ပြုသည့်နေရာမှ လုံးဝမထွက်သွားရပေ။ ဆိုလိုသည်မှာ ဝုဿွူထပ်မံပြုရန်အတွက် မိမိဆွလာသ်ဝတ်ပြုသည့်နေရာမှ မထွက်သွားရပေ။ အဘယ်ကြောင့်ဆိုသော် သေချာခိုင်မာသည့် အရာတစ်ခုကို သံသယက မပယ်ဖျက်နိုင်ပေ။ ၎င်းသည် ဝုဿွူပြုထားသည်မှာ သေချာခိုင်မာပြီး လေလည်ခြင်းသည် သံသယသာဖြစ်သည့်အတွက် အသံမကြားသ၍ သို့မဟုတ် အနံ့မရသ၍ ဗလီဝတ်ကျောင်းတော်မှ လုံးဝမထွက်သွားရပေ။ ဆိုလိုသည်မှာ မိမိ၏ဝုဿွူကို ပျက်စေသည့် ကိစ္စမျိုးဖြစ်ခဲ့ကြောင်း သေချာသည်အထိ တနည်းအားဖြင့် အနောက်လမ်းကြောင်းမှ လေထွက်သည့် အသံကြားလိုက်ခြင်း သို့မဟုတ် အနံ့ရလိုက်ခြင်းတို့ ဖြစ်ပေါ်လာမှသာလျှင် ထွက်သွားရမည်ဖြစ်သည်။ ဤအခြေအနေတွင် အသံကြားခြင်းနှင့် အနံ့ရခြင်း နှစ်မျိုးစလုံးရှိရမည်ဟု သတ်မှတ်ချက်မရှိပေ။ သို့သော် လူတစ်ဦးသည် ထိုသို့သံသယစိတ်မဖြစ်ပေါ်ဘဲ၊ အသံကြားခြင်း အနံ့ရခြင်းတို့မရှိဘဲ လေလည်လိုက်ကြောင်း သေချာသိလျှင် ၎င်း၏ဝုဿွူပျက်သွားပြီဖြစ်သည်။ ဟဒီးဆ်တော်၏ ဆိုလိုရင်းသည်လည်း သေချာပေါက်သိခြင်းသည်သာ အဓိကဖြစ်သည်။ ဤသည် လေလည်လိုက်ကြောင်း သံသယဖြစ်နေသူနှင့်ပတ်သက်၍ အလ္လာဟ်အရှင်မြတ်၏တမန်တော်(ဆွလ္လလ္လာဟုအလိုင်းဟိဝစလ္လမ်)၏ ထံတော်မှလာရှိထားသည့် မိန့်ကြားချက်ပင်ဖြစ်သည်။ သို့သော် ယင်းသည် လေလည်လိုက်သည့်အသံကို ကြားရမှသာ သို့မဟုတ် အနံ့ရမှသာ ဝုဿွူပျက်သည်ဟု ဆိုလိုခြင်းမဟုတ်ပါ။ ဤဟဒီးဆ်တော်တွင် အလွန်ပင်အရေးကြီးသော အခြေခံစည်းမျဉ်း တစ်ချက်ပါရှိသည်။ ၎င်းမှာ သံသယသည် သေချာခိုင်မာသည့် အရာတစ်ခု၏အမိန့်ကို မပယ်ဖျက်နိုင်ပါ။